Сакам да играме на Европско првенство, на Светско првенство, да напредуваме и да бидеме идоли на некои нови млади деца и да бидеме поттик за нив, кажа стрелецот на првиот гол, Елиф Елмас
Следен противник на нашата репрезентација е Белгија на 10.октомври, на гостински терен
Фудбалската репрезентација на Македонија вечерва во Скопје го совлада Лихтенштајн со 5-0.
Серијата голови ја отвори Елиф Елмас уште во првото полувреме, иако официјално голот е запишан како автогол на голманот на Лихтенштајн Бенџамин Бухел во 15. минута.
На почетокот на вториот дел нашиот тим зголеми на 2:0, а стрелец беше капитенот Енис Барди.
На 3:0 четири минути подоцна погоди Дарко Чурлинов, а четвртиот гол го постигна Лирим Ќамили во 86. минута.
Конечните 5:0 ги постави Лука Станковски во 90. минута.
„Среќен сум за победата. Најважно е што ги освоивме бодовите на овој натпревар и заслужено победивме со 5:0. Ние секогаш кога играме, играме да победиме и со тоа да го оствариме нашиот сон. Сакам да играме на Европско првенство, на Светско првенство, да напредуваме и да бидеме идоли на некои нови млади деца и да бидеме поттик за нив“,
кажа Елмас.
Со новите три бодови македонскиот национален тим се врати на првата позиција на табелата во групата Ј од квалификациите за СП 2026.
Следен противник на нашата репрезентација е Белгија на 10.октомври на гостински терен.