Тој смета дека родителите треба да работат на насочување на употребата на мобилните телефони кон корисни работи, наместо кон содржини што одземаат премногу време без корист
Министерот за дигитална трансформација Стефан Андоновски вели дека Македонија засега не планира да воведе радикални забрани за социјалните мрежи за деца, како што е австралискиот модел кој предвидува забрана за лица под 16 години.
Андоновски истакна дека иако прашањето е разгледувано, сепак, секоја таква забрана носи ризици и треба да се процени подготвеноста на општеството за толку радикален чекор.
Според министерот, фокусот во моментов треба да биде на едукацијата и соработката со родителите.
„Секоја забрана, треба да бидете свесни, како ќе ја донесете – ќе има два ефекти. Ако не успеете да ја имплементирате до крај, таа ќе придонесе некои да се снаоѓаат, а некои да излезат целосно од контрола“,
рече Андоновски.
Тој смета дека родителите треба да работат на насочување на употребата на мобилните телефони кон корисни работи, наместо кон содржини што одземаат премногу време без корист.
„Ако родителите го имплементираат тоа кај своите деца, тогаш децата нема да имаат пристап до алгоритми и содржини кои се штетни за нив. Ако тоа не го прават родителите, многу е потешко државата да се меша во слободниот избор на секој граѓанин и семејство“,
додаде тој.
Андоновски посочи дека во земјава веќе се работи на заштита на децата преку Центарот за побезбеден интернет и оти секој социјален медиум има граница за под 16 години.
Иако австралискиот закон можеби ќе има позитивен ефект доколку успее, неговото очекување е дека тој нема да биде целосно успешен бидејќи веќе се наоѓаат начини за заобиколување на забраните преку технички уреди.