Новото финансирање за земјава, кое е во рамките на Операцијата за развојна политика на одржливост и отпорност на С Македонија, беше одобрено денеска од страна на Бордот на директори на Светска банка
Во обид да се зајакне фискалната позиција и финансискиот сектор во земјата, но и за да се зајакне зелената транзиција на Македонија, Светска банка денеска одобри и обезбеди заем во вредност од 93,8 милиони евра, кое впрочем е во согласност со макроекономските приоритети на Северна Македонија, според Фискалната стратегија 2024-2028 и Програмата за економски реформи 2023-2025 на Владата.
„Македонија, како и други земји во Европа, се соочува со континуирани инфлаторни притисоци, што ги оптоварува јавните финансии во услови на монетарно затегање и зголемени трошоци за задолжување, и затоа со оваа поддршка, наша цел е да обезбедиме брзи финансиски средства за зајакнување на фискалната одржливост, истовремено поддржувајќи ги неопходните климатски реформи и енергетска транзиција на земјата“,
рече директорот на Канцеларијата на Светска банка за Македонија и Косово, Масимилиано Паолучи.
Новите операции на Светска банка ги подржуваат напорите за намалувањето на зависноста од фосилни горива на земјава, преку подобрена енергетска ефикасност во јавниот сектор, зголемени инвестиции во обновливи извори на енергија и подобро собирање на податоци во врска со изложеноста на банкарскиот сектор на климатските ризици.
А со овие реформи се проектира дека може да ѝ помогнат на Македонија во привлекување на околу 45 милиони евра приватни инвестиции за обновлива енергија, вклучително и инсталација на соларни панели, до 2026 година.
„Соработувавме заедно со меѓународните партнери за да се осигуриме дека нашата поддршка на политики и техничка помош се комплементарни и усогласени со агендата за пристапување кон Европската Унија“,
рече Сања Маџаревиќ Шујстер, виш економист за Западен Балкан при Светска банка.
Заемот од Светска банка се состои од единечна транша за повлекување од 93,8 милиони евра со рок на доспевање од 11 години, вклучувајќи 4,5 години грејс-период.