На средбата меѓу шефот на македонската дипломатија Тимчо Муцунски и вицепремиерот и министер за надворешни работи на Обединетите Арапски Емирати, шеикот Абдула бин Зајед Ал Нахјан, во Дубаи станало збор и за можноста за воспоставување директна авиолинија меѓу Скопје и ОАЕ
Меморандум за разбирање е потпишан меѓу Владата на Република Северна Македонија и Владата на Обединетите Арапски Емирати за размена на искуства во областа на развојот и модернизација на Владата. Документот, како што соопштија од Министерството за надворешни работи и надворешна трговија, е потпишан при денешната билатерална средба на шефот на македонската дипломатија Тимчо Муцунски со вицепремиерот и министер за надворешни работи на Обединетите Арапски Емирати, шеикот Абдула бин Зајед Ал Нахјан, во Дубаи.
Со Меморандумот, се наведува во соопштението, се воспоставува институционална рамка за систематска соработка насочена кон унапредување на јавните политики, јакнење на административните капацитети, дигитална трансформација и примена на иновативни модели на управување.
„Потпишувањето на документот отвора нови можности за размена на знаења, експертиза и добри практики, како и за реализација на заеднички активности и проекти во области од заемен интерес, со цел зголемување на ефикасноста и квалитетот на владините услуги“,
велат од Министерството.
На средбата станало збор и за можноста за воспоставување директна авиолинија меѓу Скопје и Обединетите Арапски Емирати.
„Воедно беше направен сеопфатен преглед на билатералните односи, при што беа разгледани можностите за нивно натамошно продлабочување. Посебен акцент беше ставен на унапредувањето на политичката соработка, јакнењето на економските врски и интензивирањето на трговската размена меѓу двете земји“,
се додава во соопштението од Министерството.
Двете страни ја потврдиле заедничката определба за натамошно зајакнување на партнерските односи и развој на конкретни иницијативи. Тоа, како што се посочува во соопштението, ќе придонесе за одржлив економски раст, институционална ефикасност и продлабочена соработка меѓу земјава и ОАЕ.