Членовите на семејството на Фросина и роднините кои се присутни денеска во судницата носеа маици на кои пишува „Правда за Фросина”
Јас не сум мајка која го изгубила своето чедо, туку човек со откорната душа. Јас сум гласот на Фросина оти таа не може да зборува. Таа не беше прегазена, туку убиена на начин кој не може да се замисли, рече Камелија Кулакова, мајка на Фросина Кулакова која на 29 јануари беше прегазена на пешачки премин во Скопје.
Емотивното обраќање на мајката предизвика солзи кај блиските на младата девојка кои беа присутни во судницата на првото рочиште од судскиот процес против Васил Јованов, обвинет за прегазувањето на Фросина. Мајката ова го кажа откако се изјасни дека како законски застапник на Фросина се придружува на кривичниот прогон и ќе бара отштетно побарување, во граѓанска постапка.
„Возејќи пијан, без возачка дозвола, одминувајќи возила, ја удрил мојата Фросина со толкава брзина со што таа со главата ја скршила шофершајбната, се качила на покривот на возилата, а од силината била отфрлена и од ударот го скршила столбот од семафорот“,
рече мајката.
Таа сведочеше за повредите што ги имала Фросина од ударот, а кои биле многубројни и тешки.
„Кој член од законот може да го измери ова. Ова не е судење за сообраќајка, туку за грабеж на живот, за убиство. Барам највисока казна, не одмазда, туку за правда и ниту едно дете да не го доживее ова. Покажете дека правдата има душа и дека законите имаат лице. Правдата нема да ми ја врати Фросинче, но ќе ми ја врати вербата дека нејзиниот живот не згаснал залудно и затоа барам максимална казна”,
рече мајката.
Таткото Тодор Кулаков кажа дека ова е судење за цел еден систем на неказнивост.
„Длабоката коруптивност не доведе до ова“,
рече тој.
Дека не станува збор за обична сообраќајка, и тоа не е поради медиумската помпа што следуваше по настанот, туку поради фактите што говорат за начинот на која била направена и многубројните пропусти направени од сторителот и згаснатиот млад живот на Фросина Кулакова, кажа и обвинителот на Основното јавно Скопје, Александар Марковски, во воведните зборови на денешното рочиште.
„Беа прибавени докази во поприличен број, беа изготвени четири вештачења од кои сообраќајното е особено податливо. Има осум сведоци, има многубројни материјални докази од кои дел останале во подоцнежното обвинение поднесено против таткото“,
рече обвинителот.
Членовите на семејството на Фросина и роднините кои се присутни денеска во судницата носеа маици на кои пишува „Правда за Фросина”.