Според првичните сознанија на обвинителството, во моментот на настанот мајката и малолетното девојче биле сами во станот и заклучени од внатрешната страна. По наредба на судија на претходна постапка, денеска ќе се врши детален претрес на станот
Едно лице е задржано во полициска станица по трагичниот настан во скопско Тафталиџе, кога мајка и дете беа пронајдени мртви по пад од балкон од зграда. Како што информира Основното јавно обвинителство Скопје, по наредба на обвинител се преземаат дејствија за испитување на евентуална кривична одговорност кај ова лице.
„ОЈО Скопје ги издава сите потребни наредби и насоки за целосно расчистување на случајот. Денеска, по наредба на јавниот обвинител се вршат распити на повеќе лица кои имаат определени сознанија, се врши екстракција на податоци од мобилни телефони и се обезбедуваат снимки од видеонадзор и други снимки од неколку локации“,
информираат од скопското обвинителство.
Според првичните сознанија на обвинителството, во моментот на настанот мајката и малолетното девојче биле сами во станот и заклучени од внатрешната страна. По наредба на судија на претходна постапка, денеска ќе се врши детален претрес на станот во кој живееле, кој по вчерашниот увид остана запечатен.
Од вчера веќе е наредена и обдукција на телата на починатите.
Во врска на наводите во медиумите, но и на братот на починатата жена, дека таа и нејзината ќерка биле жртви на долгогодишно семејно насилство, од Обвинителството велат дека е побарано детално известување од МВР и од Центарот за социјални работи со сите евентуални претходни пријави и поплаки од оштетената. Дополнително, на внатрешната контрола при МВР ќе ѝ биде наредено да го испита постапувањето на полицијата по тие случаи.