Од добиените информации од Амбасадата во Тел Авив и имајќи го предвид прекинот на огнот што е во сила од 24 јуни и стабилизирањето на безбедносната состојба, државјаните што претходно беа подготвени за итна евакуација во моментов го одложуваат своето заминување
Четиричлено семејство – мајка со три деца – вчера е евакуирано со лет од Тел Авив до Атина, информираат денеска од Министерството за надворешни работи и надворешна трговија.
Оттаму информираат дека заклучно со денеска, вкупниот број на евакуирани македонски државјани изнесува 12 лица.
„Осум се реализирани преку Египет со владин авион и четири преку Атина. Најголемиот дел од евакуираните се деца – седум од вкупно 12 лица“,
информираат од Министерството за надворешни работи и надворешна трговија.
Според Министерството, од добиените информации од Амбасадата во Тел Авив и имајќи го предвид прекинот на огнот што е во сила од 24 јуни и стабилизирањето на безбедносната состојба, државјаните што претходно беа подготвени за итна евакуација во моментов го одложуваат своето заминување.
Рестрикциите поврзани со конфликтот во Иран се укинати, а институциите, училиштата и продавниците повторно функционираат.
МНР преку Амбасадата во Тел Авив останува во редовна комуникација со сите граѓани што изразиле интерес да го напуштат Израел и доколку се јави потреба за тоа повторно ќе се преземат активности за нивна евакуација.
Останува во сила препораката да се избегнат патувања во земјите од Блискиот Исток сè до подобрување на безбедносната состојба.