Тасевски ги негира наводите и вели дека ќе разгледа дали има основа за тужба во целиот случај. Тој вели дека не знае кој го следи, но се сомнева и во лажно пријавување
Адвокатот Николовски денеска информира и дека Основниот граѓански суд Скопје повторно го забранил како незаконски штрајкот на Синдикатот и дека е утврден идентитетот на вработеното лице во М-НАВ, кое одало деловни тајни, кои подоцна биле објавени на порталот „Буревесник“
Поднесена е кривична пријава против претседателот на Синдикатот на контролорите на летање (ССКЛ), Александар Тасевски, за злоупотреба на службената должност, соопшти на денешната прес-конференција правниот застапник на Македонска навигација (М-НАВ), адвокатот Горан Николовски.
Тој нагласи дека кривичната пријава е поднесена до Основното јавно обвинителство Скопје поради злоупотреба на позицијата за остварување лични цели.
„Ја злоупотребил својата позиција и дал известување и барање за користење платени денови од работа, со најава дека ќе користи денови за синдикални активности и синдикални состаноци, а господинот заминал во приватна посета на Кипар заедно со својата љубовна партнерка“,
рече Николовски.
За доказите во врска со приватното патување на Тасевски, тој појасни дека информацијата за петдневната посета не потекнува од следење од службите, туку од медиумите.
„Заминал во приватна посета со својата љубовна партнерка. Неговата посета таму е констатирана од страна на новинар. И така е пренесена информацијата“,
кажа Николовски.
За ова, претседателот на ССКЛ, Тасевски, во изјава за телевизија Телма, ги негира наводите и вели дека ќе разгледа дали има основа за тужба во целиот случај. Тој вели дека не знае кој го следи, но се сомнева и во лажно пријавување.
„Очигледно дека М-НАВ веќе влегува во паника поради тоа што не им успеваат намерите да го растурат синдикатот и сега на некаков начин се обидуваат да внесат немир меѓу членовите. Што, тие ангажирале некаков си детектив, ме следат мене ли?! Имаат многу попаметна работа. Ете, ќе се докажуваме. Ама знаете дека за лажно пријавување се одговара и на друг начин, така што тоа е тоа. Ќе ја почнат играта и самите ќе си пропаднат во таа дупка“,
возврати Тасевски.
Адвокатот Николовски денеска информира и дека Основниот граѓански суд Скопје повторно го забранил како незаконски штрајкот на Синдикатот. Според него, штрајкот бил забранет поради отсуство на барања за заштита на правата од работен однос, неспроведена задолжителна постапка за помирување и поради тоа што ССКЛ немала правен легитимитет самостојно да организира штрајкови.
„Повторно, од страна на Основниот граѓански суд Скопје, штрајкот што беше најавен од подружницата ССКЛ е забранет како незаконски. Штрајкот е забранет поради три основи, односно барањето за штрајк не содржи никакви синдикални барања, односно барања за заштита на правата од работен однос, не е спроведена задолжителна постапка за помирување и последната констатација на судот е дека ССКЛ, како подружница, нема правен легитимитет самостојно да организира и да спроведува штрајкови“,
рече Николовски.
Поради најавите за нови штрајкови, М-НАВ поведе и посебна судска постапка, со која бара утврдување дека ССКЛ, генерално, нема право самостојно да настапува и да организира вакви активности. Ова барање, како што посочи адвокатот, се заснова на Законот за работните односи и на статутот на Независниот синдикат за сообраќај и врски.
„Со оглед на најавите дека ССКЛ повторно ќе иницира, односно ќе најавува штрајкови, од страна на М-НАВ поведена е и посебна судска постапка, каде што се бара судот да утврди дека ССКЛ, воопшто и генерално, нема право самостојно да настапува како подружница и да организира и да спроведува штрајкови“,
додаде адвокатот.
Тој додава дека ова се заснова на Законот за работните односи, кој го регулира основањето и функционирањето на синдикатите, и воедно на статутот на Независниот синдикат за сообраќај и врски, каде што, како што вели, е определено дека подружниците воопшто немаат статус и воопшто немаат легитимитет во согласност со Законот за работните односи.
На прес-конференцијата беше соопштено и дека е утврден идентитетот на вработеното лице во М-НАВ, кое одало деловни тајни, кои подоцна биле објавени на порталот „Буревесник“.
„Во М-НАВ е спроведена постапка, при што е утврден идентитетот на вработеното лице што тие податоци, кои имаат третман на деловна тајна, ги сторило достапни на лицето Зоран Божиновски, а потоа преку неговите портали станале достапни за пошироката јавност како во Македонија така и во странство“,
рече правниот застапник на М-НАВ и додаде дека во фаза на изготвување е нова кривична пријава.
Одговарајќи на новинарски прашања за мотивите на Синдикатот, Николовски истакна дека станува збор за обид за дефокусирање на јавноста и на ресурсите на компанијата.
„Според мене, можеби грешам, можеби не грешам, затоа што сепак индивидуалните цели се лични, сметам дека станува збор за еден обид за дефокусирање како на јавноста така и на капацитетите и ресурсите на М-НАВ, односно да се дефокусираме од тоа што е суштинско и да се влечеме по судови за беспредметни постапки“,
одговори Николовски.
Нагласувајќи ја стратегиската важност на институцијата, која ја гарантира безбедноста на авиосообраќајот, адвокатот истакна дека М-НАВ е должна да презема дејства за заштита на својот капитал и на интересите на државата секогаш кога има основани информации, а конечната одлука за иницирање кривична постапка ја носи исклучиво Јавното обвинителство.