Судот, како што наведуваат од М-НАВ, утврдил дека најавениот штрајк е спротивен на законските одредби, бидејќи не била спроведена постапка за мирно решавање на колективните спорови, како и дека штрајкот не произлегува од конкретните барања од работен однос
Државната компанија задолжена за контрола на македонското небо – М-НАВ АД Скопје соопшти дека Основниот граѓански суд Скопје денеска донел решение со кое се забранува најавениот штрајк на контролорите на летање.
Судската забрана, за која информираат од М-НАВ, доаѓа откако Струковиот синдикат на контролори на летање (ССКЛМ) повторно ја активира одлуката за штрајк, најавувајќи дека на 20 и на 24 октомври македонскиот воздушен простор ќе биде целосно затворен за авионски сообраќај.
Причината, како што наведоа од Синдикатот, е неисполнувањето на дадените ветувања од страна на менаџментот и загрижувачката состојба во претпријатието.
„М-НАВ АД Скопје ја информира јавноста дека основниот граѓански суд Скопје на 16.10.2025 година донесе решение со кое се УСВОЈУВА предлогот на М-НАВ АД Скопје за изрекување на привремена мерка – ЗАБРАНА на најавениот штрајк од страна на Струковиот синдикат на контролори на летање ССКЛ-подружница на Независниот синдикат на работниците од сообраќајот и врските на РСМ Скопје“,
се вели во соопштението од М-НАВ.
Судот, како што додаваат оттаму, утврдил дека најавениот штрајк е спротивен на законските одредби, бидејќи не била спроведена постапка за мирно решавање на колективните спорови, како и дека штрајкот не произлегува од конкретните барања од работен однос.
Од Управниот одбор на М-НАВ велат дека го поздравуваат решението на скопскиот Основен граѓански суд и ја нагласуваат, како што додаваат, својата определба за почитување на законитоста, континуирано обезбедување на безбедност и непречено функционирање на воздушниот сообраќај во Република Северна Македонија.
Струковиот синдикат на контролори на летање (ССКЛМ) штрајкот го најави на 4 октомври, обвинувајќи го раководството на М-НАВ дека намерно блокира клучни кадровски решенија и дека системот на работ на колапс.
Од синдикатот тогаш нагласија дека 20 октомври е намерно избран како датум за почеток на штрајкот – ден по локалните избори – за да не може раководството да го претстави како политички мотивиран.
Неколку дена подоцна, односно на 9 октомври се огласија од раководството на М-НАВ, од каде што наведоа дека работата на контролата на летање не смее и не може да запре под никакви околности поради ризикот по безбедноста на сите граѓани.
Од менаџментот на државната компанија рекоа дека го признаваат правото на синдикатите да организираат штрајк како дел од борбата за подобрување на работничките права, но додадоа дека во ваква безбедносна институција тој мора да биде организиран така што ќе биде ангажиран доволен број контролори на летање и останати вработени.
„Ниту една активност на синдикатите или кои било други субјекти не смее да доведе до загрозување на животите или инфраструктурата“,
беше наведено во реакцијата од М-НАВ.
Оттаму наведоа дека остануваат отворени за конструктивен социјален дијалог со синдикалните претставници и оти се подготвени да разгледаат „реални и објективни барања за кадровските и организационите прашања“.
Од институцијата тогаш најавија дека дека ќе ги преземат сите неопходни мерки за непречено и безбедно функционирање на воздушниот сообраќај и дека нема да дозволат активности кои можат да ги загрозат патниците или функционирањето на системот.