Вкупно 8 700 граѓани одлучија да ги донираат средствата од проектот „Мој ДДВ“ во Фондот за справување со ковид-19, што е регулирано во Уредбата за примена на Законот за враќање на дел од ДДВ на физички лица за време на вонредна состојба, информира денеска директорката на Управата за јавни приходи (УЈП), Сања Лукаревска.
„Рокот на изјаснувањето за повратот на ДДВ заврши на 5 мај и вкупно 8 700 корисници на апликацијата ‘Мој ДДВ’ одговориле потврдно на опцијата за донирање, а 35.219 корисници одговориле дека сакаат да им биде исплатен повратот од скенирањето на сметките во целост. Износот на донацијата која изнесува 9 529 917 денари ќе се донира во Фондот за справување со ковид-19“,
рече Лукаревска на денешната прес-конференција.
Таа нагласи дека до УЈП стигнале мејлови од граѓани кои, како што рече, погрешно и ненамерно притиснале опција донирај и бараат средствата да им бидат исплатени на сметката.
„За нив дополнително во најкраток можен рок ќе известиме за начинот на исплатата. Опцијата донирај беше поставена за доброволен избор на секој корисник на апликацијата ‘Мој ДДВ’ и сакам да им се заблагодарам на сите граѓани кои го донираа својот поврат на ДДВ и помагаат за полесно справување со кризата од коронавирусот“,
потенцира Лукаревска.
Нагласи дека даночните службеници од УЈП во моментов се и агенти во владиниот контакт центар и тие, како што рече, стојат на располагање за сите прашања и одговори поврзани со мерките што ги спроведува Управата.
Направена е и мејл група [email protected] која има за цел непречено и точно информирање.
Во одговор на прашање, директорката на УЈП истакна дека задоволува бројката на 23 861 барање на 21 542 компании за финансиска поддршка до 14 500 денари за исплата на платата по вработен за април годинава.
„Со можноста за комбинирање на мерките и со користење на другите поволности од сетот економски мерки е оставено на доброволна основа секоја компанија сама да одлучи каква помош и каква мерка ќе користи. Очекуваме дека во мај можеби ќе има зголемување на барањата, но сепак сметавме дека рокот за пријавување е повеќе од доволен затоа што на дневно ниво првите неколку дена на секој час имавме по можеби 500 барања што не е мала бројка“,
рече Лукаревска.
Прашана дали УЈП смета дека е време за итен ребаланс на Буџетот поради падот на приходите, Лукаревска рече дека тоа прашање ќе се разгледува понатаму и заедно со Министерството за финансии доколку има таква потреба ќе се извести јавноста.