За прекршувањето на протоколите на митинзите денеска зборуваше и министерот Филипче, кој е потпретседател на СДСМ и често може да се забележи на митинзите. На прашања околу тоа зошто не се бара сертификат за вакцинација на ваквите собири, тој посочи дека тоа треба да се прави секаде каде што има влез и излез на настаните, па ќе им препорача на партиите, ако можат, да се организираат
Премиерот и лидер на СДСМ, Зоран Заев, вели столчињата на митинзите се наместени согласно протоколите за заштита од ковид-19, но проблемот во прекршувањето е од луѓето што доаѓаат отстрана, самоиницијативно и не држат дистанца.
Ваквото согледување тој го изнесе одговарајќи на новинарско прашање што прават полицијата и инспекциите за флагрантното кршење на здравствените протоколи на партиските митинзи и дали постои премолчен договор периодов да се „замижи“ на тоа.
„Јас само ќе апелирам да се обратите до соодветните институции да може да дадат соодветен одговор затоа што овде сум претседател на влада и не би сакал да одговорам за партиски работи, освен што ќе кажам дека се гледа распоредот на столчињата како се наместени согласно протоколите, а секако веројатно проблемот е тоа што предизвикува дополнително луѓето што доаѓаат од страна, кои не ја запазуваат неопходната оддалеченост и целосното почитување на протоколите. Секако дека нема никакви договори, сите си ветивме дека ќе направиме сѐ, имајќи предвид дека работиме со граѓани кои доаѓаат самоиницијативно на ваквите јавни собири. Сепак, организаторите на митинзите ќе направиме сѐ за максимум да се почитуваат протоколите“,
изјави денеска Заев на прес-конференцијата во Владата.
На оваа тема денеска зборуваше и министерот за здравство Венко Филипче, кој како потпретседател на СДСМ исто така често може да се забележи на партиските митинзи. Тој вели дека на отворените митинзи добро е граѓаните да носат маска за да се заштитат себеси и другите кога можат, без разлика на тоа што нема официјална препорака, а нема, како што вели, бидејќи ситуацијата е мошне стабилна.
На дополнително прашање зошто не се бара сертификат за вакцинација на ваквите собири, тој посочи дека тоа треба да се прави секаде каде што има влез и излез на настаните, па ќе им препорача на партиите, ако можат, да се организираат.
„Секаде каде што има влез и излез тоа би требало да се прави. Тешко е да се организира каде што се собираат граѓаните, но се согласувам дека забелешката ви е на место. Уште денеска ќе најдам начин да препорачам до сите политички партии да најдат начин сето тоа да биде искоординирано, доколку може, со влез и излез“,
изјави Филипче.
Во однос на изборниот ден, посочи тој, постојат протоколи исто како што беше и на ланските парламентарни избори.
„Огромен процент од сите тие што се вклучени во целокупниот процес, верувам дека се вакцинирани. Но, и за време на претходните избори, кога сè уште немаше вакцина, запазувајќи ги сите протоколи за спроведување на настани на затворено, немаше некој случај на пренос на вирусот. Така што сметам дека со придржување на тие протоколи, кои се општи протоколи за превенција, целокупниот тој процес ќе биде добро организиран и ќе значи: држење на дистанца, неконцентрирање, односно пуштање по еден или двајца граѓани на гласање, исто како што беше организиран и претходниот изборен циклус“,
рече Филипче.