Литванската влада информира дека ќе бидат затворени премините „Тверециус“ и „Сумскас“, а сообраќајот ќе биде пренасочен кон граничниот премин „Медининкаи“, кој е најголем од шесте контролни пунктови во Литванија
Владата на Литванија денеска одлучи да затвори два од шесте гранични премини со Белорусија поради „геополитичките околности“ кои настанаа откако Белорусија прифати членови на руската платеничка група „Вагнер“.
Два селски премини, кои не се користеле за комерцијалните возила, од петок ќе бидат затворени.
Литванската влада информира дека ќе бидат затворени премините „Тверециус“ и „Сумскас“, а сообраќајот ќе биде пренасочен кон граничниот премин „Медининкаи“, кој е најголем од шесте контролни пунктови во Литванија.
Соседна Полска годинава ги затвори сите гранични премини со Белорусија освен еден, откако во таа земја беше затворен полски новинар и беа протерани полски дипломати.
Во Полска веќе подолго време расте загриженоста за активностите на платеничката група „Вагнер“ во Белорусија и сè поголемиот број мигранти од кризните подрачја кои неовластено сакаат да влезат во Европската Унија преку соседната земја.
Полска минатата година со висока ограда ја обезбеди границата со Белорусија долга 418 километри, а во октомври, истовремено со парламентарните избори, ќе одржи референдум дали таа треба да се зачува.