Тој предвидува итни консултации доколку членка на Алијансата е загрозена
Властите во Литванија, членка на ЕУ и на НАТО, денеска соопштија дека ќе воведат вонредна состојба по воздушниот и копнениот напад на руската армија врз Украина.
„Денеска ќе потпишам указ за воведување вонредна состојба“,
изјави литванскиот претседател Гитанас Наузеда по состанокот на националниот совет за одбрана.
Тој додаде дека Литванија ќе побара активирање на членот 4 од Договорот на НАТО, кој предвидува итни консултации доколку членка на Алијансата е загрозена.
Генералниот секретар на НАТО, Јенс Столтенберг, го осуди рускиот „непромислен напад“ врз Украина.
Во објава на Твитер, тој вели дека со нападот се доведуваат во ризик безброј животи на цивили.
„Ова е сериозно прекршување на меѓународното право и сериозна закана за евроатлантската безбедност“,
додава тој.
Столтенберг посочи дека сојузниците од НАТО ќе се состанат за да се осврнат на „обновената агресија“ на Русија.
Амбасадорите на НАТО најавија итен состанок.
Францускиот претседател Емануел Макрон повика „што е можно поскоро“ да се одржи самит на НАТО.
„Претседателот сака самитот на НАТО да се одржи што е можно поскоро, во координација со нашите партнери и сојузници“,
наведе во соопштение претседателството.
Потегот е одговор на повиците од Британија и Полска пред прес-конференцијата подоцна во текот на денот на шефот на НАТО, Јенс Столтенберг.