Дополнително, како што додаваат од Владата, законските измени предвидуваат „за следните контроли жалбата да не го одлага извршувањето“, односно суспензијата да стапува во сила веднаш
Со измени и дополнувања на седум закони ќе се утврди обврска минимум двапати годишно да се вршат проверки на сите фирми кои поседуваат лиценци, а кои се под надлежност на Министерството за транспорт.
Измените, кои претходно денеска ги најави ресорниот министер и вицепремиер Александар Николоски, се усвоени на редовната 63. Седница на Владата одржана попладнево, а доаѓаат по трагедијата во т.н. кабаре-клуб во Кочани, во која животите ги загубија 59 лица.
Во таа насока, како што информираа од Владата, усвоените измени и дополнувања на седум закони кои се надлежност на Министерството за транспорт се со цел да се вршат почести контроли на сите иматели на лиценци, дозволи и одобренија, односно овласувања.
Ако се земе предвид надлежноста на Министерството, минимум двапати годишно ќе се контролираат фирми од областа на градежништвото и урбанизмот.
„Имајќи предвид дека се издаваат многу лиценци, одобренија, дозволи или овластувања од страна на Министерството за транспорт, овие законски измени имаат за цел да предвидат законска обврска двапати годишно да се врши таа проверка на сите иматели на лиценци издадени согласно Закон. Тоа секако не ја исклучува можноста да се вршат повеќе контроли, односно почести од предвидените со закон, сè со цел обезбедување на квалитетни услуги и сигурност на граѓаните кои се корисници на тие услуги од лицата иматели на лиценци“,
се вели во соопштението од „Илинденска“ број 2.
Дополнително, како што додаваат од Владата, законските измени предвидуваат „за следните контроли жалбата да не го одлага извршувањето“, односно суспензијата да стапува во сила веднаш.
По усвојувањето од страна на Владата, измените и дополнувањата на законите треба да бидат донесени од Собранието.
Вицепремиерот и министер за транспорт Александар Николоски денеска соопшти дека на 479 фирми од областа на градежништвото и урбанизмот ќе им бидат одземени лиценците за работа бидејќи по нивното издавање престанале да ги исполнуваат законските услови врз основа на кои биле издадени.
Тој соопшти дека досега се извршени контроли на над 3 100 лиценци и дозволи за работа во делот на градежништвото и урбанизмот, а, како што појасни, контролите се прават на лиценците во делот на потребниот број вработени. Во делот на квалитетот на изведба и на навременото извршување рече дека постојат соодветни надзори кои ги контролираат градбите.
Меѓу фирмите на кои им се одземени лиценците се компании кои поседуваат А лиценца за изведувач на градби од прва категорија, фирми со Б лиценца за градби од втора категорија, потоа правни лица кои имаат лиценца за управител за одржување објекти од прва и втора категорија, за управител на градба, а неправилности се утврдени и кај 13 фирми кои имале лиценца за изработка на урбанистички планови.
Најавувајќи ги законски измени со кои контролите задолжително ќе се вршат на шест месеци, а не како досега на доброволна основа, Николоски рече дека целта не е да казнуваат, туку компаниите кои доброволно се согласиле на условите што ги предвидува законот да ги исполнуваат.