Компанијата „Гетлинк“, која управува со тунелот, соопшти дека работат на целосно нормализирање на состојбата, но патниците се предупредуваат дека прекините веројатно ќе продолжат во текот на целиот ден
Проблеми со напојувањето во Евротунелот предизвикаа прекин на сообраќајот и ги нарушија плановите на илјадници патници кои патуваат меѓу Велика Британија и Франција за време на новогодишните празници.
Иако тунелот е делумно отворен и некои линии на „Еуростар“ и „ЛеШатл“ се обновени, сообраќајот се одвива со значителни доцнења. Прекинот на електричнатта енергија и вчерашниот дефект на еден воз на „ЛеШатл“ предизвикаа целосна блокада, принудувајќи многу патници да ja поминат ноќта заглавени во возовите или на терминалите. Поголемиот дел од возовите на „Еуростар“ од Лондон до Париз, Амстердам и до Брисел беа откажани.
„Планираме да ги извршуваме сите наши услуги денес, но поради проблеми може да има некои одложувања и можни откажувања во последен момент“,
се вели во соопштението на веб-страницата на „Еуростар“.
Компанијата „Гетлинк“, која управува со тунелот, соопшти дека работат на целосно нормализирање на состојбата, но патниците се предупредуваат дека прекините веројатно ќе продолжат во текот на целиот ден. Според информациите од „Еуростар“, во моментов е достапна само една од двете главни тунелски цевки.
Според пишувањата на Би-би-си, повеќето од услугите на „Еуростар“ денеска се тргнати од Лондон, а откажани се само три линии кон Париз, Брисел и кон Амстердам.
Патниците се принудени да бараат алтернативни патишта преку траекти или авиони. Националната железница на Велика Британија советуваше патниците да не доаѓаат на станицата „Сент Панкрас“ во Лондон доколку нивните возови се веќе откажани.
Операторот „ЛеШатл“ се извини за непријатностите, наведувајќи дека доцнењата изнесуваат околу пет часа, додека автомобилите што се надеваа дека ќе го преминат Евротунелот предизвикаа сообраќаен метеж на пристапот до терминалот Фолкстон.
Инаку, според „Гетлинк“, техничкиот проблем започнал во понеделник вечерта со „инцидент поврзан со напојувањето на возовите“. Вчера, „Еуростар“ посочи дека прекинот довел до дефект на воз управуван од „ЛеШатл“, кој превезувал автомобили и товарни возила низ тунелот.