Лимани зборуваше и за проблемот со иселувањето од Кичево, за зголемениот број на бездомни животни но и со деценискиот застој во изградбата на новата болница
Независниот кандидат за градоначалник на Кичево, Фатмир Лимани во вечерашното гостување на „360 степени“ зборуваше за еден од поголемите проблеми со кои се соочува општината, а тоа е нерегулираниот отпад и дивите депонии кои се создаваат во општината.
Лимани ветува дека има решение за овој проблеми по примерот на Швајцарија и Германија преку селектирање на отпадот и негово рециклирање.
„Имам план ова да се реши врз основа на три прашања. Прво, за тие домаќинства кои не се подготвени да вршат класификација, што значи отпадот го фрлаат во една вреќа, заедно без да го класифицираат, за нив ќе има повисок данок или такса, повисока сметка. Сега ќе калкулирам, ќе го направиме 1500 денари, и за тие домаќинства кои ќе вршат класификација ќе има некаде 500 денари. На пример, со ова ќе се занимаваат и структурите кои се занимаваат со истражувањето на оваа проблематика. А во меѓувреме, се поставува прашањето што да правиме со домаќинствата кои немаат приходи, немаат никаква плата? За нив планираме да направиме депонија, но не класична депонија, туку депонија во која може да оди секој што нема услови да плати средства за отпадот да оди и да го фрли класификуван отпадот што го има. На пример, пластиката кај пластиките, стаклото кај стаклата, хартијата кај хартиите, железото кај железото… Значи, има еден модел врз чија основа ќе го решиме ова, но ова бара време“,
вели Лимани.
Тој зборуваше и за проблемот со иселувањето од Кичево, за зголемениот број на бездомни животни но и со деценискиот застој во изградбата на новата болница. Лимани упати критики до функционери од централната власт, како што вели, повеќето се од Кичево и за овие проблеми да се решат досега не презеле конкретни чекори.
„Вистина е дека секој родител денес кога ќе излезе во неговиот двор, не го сретнува своето дете, туку кучето-скитник. Ние имаме план и за кучињата-скитници, би требало во рок од еден месец тие да се систематизираат, и на крајот на краиштата и тие да се третираат исто како и луѓето бидејќи тие се создадени од Господ. Што се однесува до егзодусот кој се случува, јас мислам дека е депортирање, јас мислам дека е бркање на нашите интелектуалци, на нашите најспособни луѓе од тука, за во иднина да немаат политичка конкуренција тука. Неслучајно, и албанската и македонската дијаспора се во гени и во крв, и со срце и душа, опозициски настроени“,
вели Лимани.