На крајот на дводневниот Самитот, лидерите на ЕУ во усвоените заклучоци изразија загриженост и за безбедносната состојба на северот на Косово, а Белград и Приштина беа повикани да ги продолжат постојаните напори за деескалација и да обезбедат поскоро одржување на нови избори на северот на Косово, на кои ќе учествуваат и косовските Срби
Шефовите на држави и влади на Европската Унија (ЕУ) денеска, на крајот од дводневниот Самит во Брисел го осудија нападот врз косовската полиција во селото Бањска и изразија очекување дека сторителите наскоро ќе бидат уапсени и изведени пред лицето на правдата. За Србија изјазија очекување оти ќе соработува во истражната постапка и ќе ги преземе сите неопходни чекори во овој контекст.
На крајот на Самитот, лидерите на ЕУ во усвоените заклучоци изразија загриженост и за безбедносната состојба на северот на Косово, а Белград и Приштина беа повикани да ги продолжат постојаните напори за деескалација и да обезбедат поскоро одржување на нови избори на северот на Косово, на кои ќе учествуваат и косовските Срби.
„Неуспехот за деескалација на тензиите ќе има последици“,
посочија европските лидери во усвоените заклучоци од дводневниот Самит на ЕУ.
Челниците на земјите членки на ЕУ, меѓу другото, изразија жалење поради недоволното спроведување на Договорот за нормализација на односите меѓу Србија и Косово, неговиот анекс за имплементација, како и за другите договори постигнати во дијалогот со посредство на Унијата. Земјите се повикани да ги спроведат овие договори без дополнителни одлагања или предуслови.
„Нормализацијата на односите е суштински услов на европскиот пат на двете страни, а и двете ризикуваат да изгубат важни можности во отсуство на напредок“,
се наведува во заклучоците.
Во очи на вториот ден од Самитот на ЕУ, вчера, лидерите на Франција, Емануел Макрон, на Германија, Олаф Шолц, и на Италија, Џорџа Мелони, во Брисел одржаа одвоени средби со српскиот претседател Александар Вучиќ и со косовскиот премиер Албин Курти. Во заедничкото писмо на лидерите на земји од ЕУ, меѓу другото, се наведува дека од Белград се бара де факто признавање на независноста на Косово, а од Приштина бараат формирање на Заедница на општини со мнозинско српско население.
„Фазата на имплементација на Договорот за нормализација треба да напредува така што двете страни паралелно чекор по чекор ги исполнуваат своите обврски, врз основа на принципот дека двете страни мора да направат нешто за да добијат нешто. Сега фокусот треба да биде на унапредување на целосната имплементација на Договорот, без предуслови или одложувања“,
се наведува во заедничката декларација на Макрон, Шолц и Мелони.
Косово и Србија во февруари постигнаа основен договор за нормализација на односите, а анексот за негова имплементација беше договорен во март во Охрид, но двете страни не потпишаа ниту еден од тие документи.