Хабиб посочи дека израелската влада не се залага сериозно за договорен крај на борбите и наместо тоа се стреми да победи на бојното поле
Либан се надева оти САД се единствената земја што навистина може да направи разлика на Блискиот Исток. Либанскиот министер за надворешни работи Абдула Бу Хабиб изрази разочарување од изјавите на американскиот претседател Џо Бајден за ескалацијата на кризата меѓу Либан и Израел, но се надева оти Вашингтон сепак може да интервенира и да помогне.
„Не беше силно. Не е ветувачки и не би го решил овој проблем. Сè уште се надевам. Соединетите Американски Држави се единствената земја што навистина може да направи разлика на Блискиот Исток како и во поглед на Либан“,
рече Хабиб коментирајќи го говорот на Бајден во Обединетите нации.
Хабиб зборуваше за време на настан организиран од Фондацијата за меѓународен мир „Карнеги“.
Тој рече дека бројот на раселените Либанци, кој изнесува околу 110 илјади од 7 октомври и пред последната офанзива на Израел оваа недела, сега веројатно се приближува до половина милион.
„Се проценува дека половина милион луѓе се раселени во Либан“,
рече тој и додаде дека либанскиот премиер се надева дека ќе се сретне со американски претставници во следните два дена.
Хабиб посочи дека израелската влада не се залага сериозно за договорен крај на борбите и наместо тоа се стреми да победи на бојното поле.
Претходно во својот говор пред Генералното собрание, Бајден се обиде да ги смири тензиите во време кога има изгледи војната меѓу Израел и палестинската исламистичка организација Хамас, која трае речиси една година, да се прелее во Либан во борба против Хезболах.
„Сеопфатна војна не е во ничиј интерес. Дури и ако ситуацијата ескалирала, сепак е можно дипломатско решение“,
изјави американскиот претседател на Генералното собрание со 193 земји членки.
Бајден доби аплауз кога ги повика Израел и Хамас да ги финализираат условите за договорот за прекин на огнот и ослободување на заложниците предложени од САД, Катар и Египет.