„Владата која не може да обезбеди ред во еден ден не може да ја води државата низ сложени политички и безбедносни предизвици. Министерството за внатрешни работи, под водство на Тошковски, покажа дека нема ниту капацитет ниту визија да спречи инциденти“, велат од Левица
Левица го осуди синоќешното сквернавење на државното знаме за време на прославата на Денот на албанското знаме и побара оставка од министерот за внатрешни работи Панче Тошковски.
Како што посочија од Левица, пораките што синоќа одекнувале во неколку града во државата, а најмногу во Скопје, биле бализам, иредентизам, шовинизам и сецесионизам. Министерството раководено од Тошковски, велат од Левица, во име на коалицискиот мир и стабилност во Владата, покажа дека нема намера ниту капацитет да ги обезбеди безбедноста и достоинството на македонските граѓани.
„Во моменти кога граѓаните бараа одговори и реакција, премиерот Христијан Мицкоски и министерот за внатрешни работи Панче Тошковски избраа молк и кукавички се сокрија од јавноста. Нивната коалиција со структури како ‘Вреди’, кои отворено дивееја и ја понижуваа Македонија, само го потврдува нивното учество во организираниот хаос“,
велат од Левица.
Оттаму го повикаа обвинителството да постапи според член 319 од Кривичниот законик, согласно кој загрозувањето на сигурноста, подбив со националните, етничките и верските симболи, сторителите се казнуваат со затвор од една до пет години.
„На фотографиите и видеата јасно се гледаат лицата и регистарските ознаки на автомобилите, што овозможува МВР да ги идентификува сторителите. Доколку ова не биде направено, тогаш власта станува соучесник во ваквите настани. Државата не смее да си дозволи сервилност додека се сквернават националните симболи, се спроведува неред и насилство и се кршат законите. Владата која не може да обезбеди ред во еден ден, не може да ја води државата низ сложени политички и безбедносни предизвици. Министерството за внатрешни работи, под водство на Тошковски, покажа дека нема ниту капацитет, ниту визија да спречи инциденти. Оттука, по низата претходни скандали и неразјаснети престрелки во градот, бараме итна оставка на министерот Панче Тошковски“,
повикаа од Левица.
Во повеќе градови во земјата во текот на вчерашниот ден се одбележуваше Денот на албанското знаме. На неколку видеа објавени во медиумите се гледа како учесниците на овие прослави го сквернават македонското знаме.
(ВИДЕО) Скинато македонското знаме на прославата на албанското, СДСМ го осуди инцидентот