На прашањето каде се гледа влијанието врз Коцевски, лидерот на Левица рече дека тоа е воочливо со прекинувањето на постапката за негово разрешување и покрај тоа што претходно биле лоцирани сериозни пропусти во неговото работење од страна на Владата и Министерството за правда. Постапката за разрешување на Коцевски, според Левица, била прекината за да се обезбеди селективна истрага за случајот
Во врска со поднесената кривична пријава против него денеска се произнесе и самиот Мицкоски. Го повика Обвинителството да се произнесе за пријавата и веднаш да постапи доколку постои такво кривично дело
Пратеничката група на Левица, која брои шест пратеници во Собранието, поднесе кривична пријава против премиерот Христијан Мицкоски за кривично дело попречување на правдата, поврзано со трагедијата во Кочани. Кривичната пријава против премиерот, Левица ја темели на наводно извршено влијание врз државниот јавен обвинител Љупчо Коцевски.
„Станува збор за кривично дело против правосудниот систем член 368 став 5 од Кривичниот законик, поврзано со трагедијата во Кочани. Вака опишаното кривично дело вели дека тој што со ветување, нудење или давање некаква корист ќе влијае врз јавен обвинител да не презема со закон предвидени дејствија во постапка пред суд или друг орган, спротивно на неговата службена должност, ќе се казни со затвор од 1 до 10 години“,
рече пратеникот и лидер на Левица, Димитар Апасиев, на денешната прес-конференција во Собранието.
На прашањето каде што се гледа влијанието врз Коцевски, Апасиев вели дека тоа е воочливо со прекинувањето на постапката за негово разрешување и покрај тоа што претходно биле лоцирани сериозни пропусти во неговото работење од страна на Владата и Министерството за правда. Постапката за разрешување на Коцевски, според Левица, била прекината за да се обезбеди селективна истрага за случајот.
Според него, седум високи функционери од ВМРО-ДПМНЕ се поштедени од кривичен прогон во врска со трагедијата и тоа – началничката на ОВР Кочани, началникот на одделот за криминалистички работи во Кочани, началникот на СВР Штип, главната инспекторка за економски криминал во ОВР Кочани, сменоводителот во ПС Кочани, сопственикот на приватната агенција за обезбедување и директорот на ДПИ, Влатко Стојковски.
Апасиев додава дека не може 60-ина луѓе, колку што се опфатени во истрагата за Кочани, да се гонат за исто кривично дело. Ниеден од нив, како што рече, не е обвинет за корупција, туку за тешки дела против безбедноста бидејќи ова носи ризик обвинението да падне во судската постапка.
Додаде дека пријавата против премиерот има 14 писмени докази и изрази надеж дека Обвинителството ќе смогне сили да го повика Мицкоски на распит.
„Во подготовка ни се уште две кривични пријави против премиерот, едната е за оддавање службена тајна и во натамошниот тек ќе бидете известени и за овие пријави“,
додаде Апасиев.
Во врска со поднесената кривична пријава против него денеска се произнесе и самиот Мицкоски. Го повика Обвинителството да се произнесе за пријавата и веднаш да постапи доколку постои такво кривично дело.
„Јас сум тука, не се кријам, не бегам. Ако ценат дека навистина сум го прекршил законот јас сум подготвен со чиста свест и совест да одговарам пред граѓаните. Во кривичната пријава од Левица само ќе кажам дека има многу повеќе политика отколку суштина. Се надевам дека професорите по право, како што за себе велат во Левица, подготвиле добра и издржана кривична пријава којашто за мене ќе значи моја кривична одговорност. Ако не биде така, тогаш ќе очекувам да ми се извинат“,
рече премиерот Мицкоски на денешната прес-конференција во Владата одговарајќи на новинарски прашања.
Доколку во тој случај Левица не се извини, премиерот најави контра кривична пријава за клевета и лажно пријавување против опозициската партија.