Партијата смета дека собранискиот спикер не е надлежен да се впушта во мериторно оценување на иницијативата за распишување референдум, туку тој исклучиво може само да ја цени нејзината уредност како поднесок, од формално-правен аспект
Претседателот на Собранието, Талат Џафери, доби кривична пријава од Левица бидејќи, како што велат од партијата, тој своеволно и спротивно на Уставот, Законот и Деловникот го оневозможил спроведувањето на граѓанската иницијатива на државно ниво за собирање на 150 000 потписи за распишување задолжителен дополнителен референдум за Законот за ратификација на Договорот за добрососедство со Бугарија.
„Пријавениот се товари дека, намерно и со умисла, преку противуставното, противзаконското и противделовничкото одбивање на уредната граѓанска иницијатива – поднесена од страна на група од 646 граѓани, на пропишаниот образец од страна на Државната изборна комисија – сторил тешко кривично дело против изборниот систем – спречување избори и гласање, казниво по чл. 158, ст. 1 од Кривичниот законик, со минимална затворска казна од најмалку три години“,
велат од Левица.
Оттаму посочуваат дека собранискиот спикер не е надлежен да се впушта во мериторно оценување на иницијативата за распишување референдум, туку тој исклучиво може само да ја цени нејзината уредност како поднесок, од формално-правен аспект.
„Тој не можел сам, без претходно прибавено мислење од две собраниски комисии, да одлучи за уредноста на иницијативата. Џафери бил должен прашањето да го префрли на парламентарниот пленум на Собранието, поради тоа што само тоа има уставна и материјална надлежност да цени дали истата ќе продолжи или ќе запре, бидејќи единствено Собранието, во полн состав, на пленарна седница, е надлежно ad meritum да одлучи за уредноста или неуредноста на поднесената граѓанска иницијатива – преку носење на подзаконски правен акт наречен ‘Заклучок’ (а не ‘Известување’)!?“,
велат од Левица.
Кривичната од Левица следува откако во вторникот Џафери се огласи за иницијативата што ја поднесоа ВМРО-ДПМНЕ и му пиша на Христијан Мицкоски дека таа е спротивна на Уставот.
„Во членот 118 од Уставот на Република Северна Македонија е утврдено дека Меѓународните договори што се ратификувани во согласност со Уставот се дел од внатрешниот правен поредок и не може да се менуваат со закон. Во членот 8, став 1, алинеја 11 од Уставот е утврдено дека темелната вредност на уставниот поредок на Република Северна Македонија е и почитувањето на општоприфатените норми на меѓународното право. Поради горенаведеното, доставената граѓанска иницијатива не е прашање по кое може да се распише референдум на државно ниво“,
напиша Џафери во одговорот до Мицкоски.