Политичката партија која освои два мандата на предвремените парламентарни избори во својата програма од сферата на надворешната политика, освен јасните заложби за поништување на Преспанскиот договор и ревидирање на Договорот за добрососедство со Бугарија, нуди специфични решенија со кои би можел да се предизвика радикален пресврт во македонската надворешна политика.
Една од првите цели кон која е насочена партијата, во сферата на билатералните односи, е отповикување на признавањето на Косово, Израел и Јужна Кореја.
За разлика од прекинот на дипломатските односи со овие држави, Левица смета дека веднаш треба да биде признаена независноста на Палестина, Каталонија и на Баскија.
Тие се за воспоставување стратешко партнерство со НР Кина.
На планот на мултилатералата, оваа партија се залага за итно отчленување од НАТО и безусловно повлекување на сите безбедносни сили од странски воени мисии кои немаат мандат од ООН. Во исто време, нејзина определба е обновување на официјалните контакти со Движењето на неврзаните.
Во однос на ЕУ, Левица го поддржува зачленувањето на Македонија во оваа заедница, но инсистира во процесот на преговори да биде индивидуално вреднувана, односно да не влегува во пакет со други држави.