Лекарската комора бара итно да престане говорот на омраза кон лекарите и предупредува дека тоа е кривично дело за кое се предвидени и затворски казни. Од институцијата велат дека доколку ваквите активности продолжат, ќе бидат поднесени соодветни пријави до надлежните институции. Комората, во соопштението до јавноста, напоменува дека од самиот почеток на пандемијата, одредени структури, за кои сметаат дека се водени од нејасни цели, го негираат постоењето на вирусот и потребата од примена на заштитни мерки, како маски и одржување дистанца, со што директно влијаат на зголемениот број на заболени,
се вели во соопштението.
„Докторите од сите нивоа на здравствениот систем во изминатите година и половина активно, одговорно и пожртвувано се борат за зачувување на животите на илјадници пациенти кои директно се засегнати од пандемијата. Во таа борба лекарите го доведуваат во опасност својот живот, животот на блиските, а дел од нив и платија со сопствениот живот. Во часовите поминати со пациентите заболени од ковид, облечени во заштитна опрема, борејќи се со многу неизвесни и непредвидливи ситуации лекарите акумулираа стрес и трауми кои исто така стануваат дел од нивниот живот. Во пандемиски услови докторите не се семоќни, а за да може да се даде најдобар одговор и да се зачуваат човечките животи треба секоја единка и целото општество заедно да работи на истата цел“,
Од Лекарската комора велат дека со интензивирање на процесот на вакцинација се пристапи и кон „сатанизирање“ на вакцините, ширење лажни и неточни информации поврзани со нивното дејство со што повторно се нанесува непоправлива штета која се плаќа со човечки животи.
„Сега се оди чекор понатаму и се напаѓаат докторите директно. Со цел заштита на честа и угледот на лекарската професија, како и нејзиниот несебичен и пожртвуван придонес во справување со пандемијата, Лекарската комора најостро го осудува говорот на омраза кон лекарите кој го шират одредени структури“,
пишува во соопштението.