Според последните податоци, денеска во Србија се регистрирани 7 549 нови случаи на коронавирус, а како резултат на инфекцијата, починаа 47 пациенти
Во последните седум дена, во Србија се регистрирани вкупно 47 897 нови случаи
Србија е на првото место во Европа, а на четвртото во светот, според бројот на нови случаи на коронавирус на милион жители во последните седум дена, покажуваат најновите податоци на страницата worldometers.info.
Со 5 509 новозаразени на милион жители, Србија ја надмина Црна Гора (4 976), потоа Литванија (3 783) и Велика Британија (3 552). Меѓу првите десет земји се уште две држави од поранешна СФРЈ – Словенија на осмото место и Хрватска на десеттото место.
Во последните седум дена, во Србија се регистрирани вкупно 47 897 нови случаи на коронавирус, а најголем број нови инфекции на седумдневно ниво во Србија е регистриран во периодот од 28 ноември до 4 декември минатата година, кога беа откриени 50 946 нови случаи.
Според последните податоци, денеска во Србија се регистрирани 7 549 нови случаи на коронавирус, а како резултат на инфекцијата, починаа 47 пациенти.
Здравствениот систем станува се пооптоварен, има турканици во ковид амбулантите, како и се повеќе пациенти во болниците и на апарати за дишење.
Епидемиолозите во Србија алармираат дека земјата е во драматична ситуација во врска со пандемијата на коронавирус, дека во овој момент е предоцна воведувањето на ковид-пропусници и дека приоритет треба да биде масовната вакцинација со прва доза.
Тие препорачуваат рестриктивни мерки како затворање на кафулиња, ресторани, освен аптеки, бензински пумпи и продавници за храна, по 17 часот, додека не се намали бројот на заразени лица.
Здружението на лекари „Обединети против Ковид“ (УПК) денеска испрати отворено писмо до властите и граѓаните на Србија, во кое презентираа конкретни чекори што треба да се преземат за затворање на сите објекти што не се неопходни на четири недели и вакцинација на сите вработени во здравствената заштита, полицијата, војската, јавните служби и санкционирање на оние кои во јавниот сектор не ја почитуваат оваа обврска.
Исто така предлагаат и прекин на сите масовни собири, забрана за настани и дозволи на прослави за најмногу четири гости, забрана за сите спортски активности во затворен простор и комплетна онлајн настава, освен за градинките за деца на родители од „суштински занимања“.