Пратеникот од редовите на ВМРО-ДПМНЕ, Миле Лефков, во емисијата „Жешко политичко лето“ на Канал 5 телевизија го обвини претседателот на Собранието, Талат Џафери, дека ја злоупотребува функцијата во контекстот на обидот за поднесување на интерпелација за него.
„Господинот Талат Џафери во повеќе наврати го повреди и Уставот и Законите, но и процедурите во самото Собрание, и поради тоа е поднесена таа интерпелација. Ако ги погледнете информациите денеска тој ја врати интерпелацијата поради наводно непочитување на членот 136 од Деловникот, односно дека не се содржани сите елементи. Но, членот 136 од Деловникот е поврзан и со членот 135 со кои се предвидени кои составни делови треба да ги има законот како поднесок во Собранието. А интерпелацијата не е закон и не претставува поднесок од таков вид, така што имаме уште едно неделовничко одбивање и злоупотреба на неговата положба,
истакна Лефков.
Како што информираат од неговата матична партија, Лефков во текот на гостување се надоврзал и на Резолуцијата за преговорите со Бугарија и истакнал дека овој документ е да се создаде национален консензус за најзначајните прашања кои што постојат во државата и таков вид на резолуции донесуваат и други држави.
„За жал гледате кај нас меѓународните односи се базираат на целосно приватизирање на преговарањето односно на „решавање“ билатералниот спор помеѓу Македонија и Бугарија. Наместо да се обединиме сите политички партии без разлика на тоа дали се власт, дали се опозиција, или без разлика на некои други идеолошки определби најзначајните национални прашања треба да бидат формулирани во црвени линии, донесени токму во највисокиот Законодавен дом, во Собранието на Република Македонија. Токму Резолуцијата ќе ги зацврсти нашите позиции, и тоа ќе ни даде силна преговарачка позиција со нашиот сосед“,
нагласи Лефков.