Новоизбраниот претседател на СДСМ Димитар Ковачевски, заедно со неговиот претходник и актуелен премиер Зоран Заев денеска одржуваат средби со претставници на коалициските партнери кои се дел од парламентарното мнозинство
Раководството на ЛДП, претседателот Горан Милевски, потпретседателите Моника Зајкова, Игор Велјановски и генералниот сектретар Боби Мојсоски, на денеска одржаната работна средба со раковoдството на СДСМ, односно со новиот претседател Димитар Ковачевски, генералниот секретар Љупчо Николовски и премиерот Зоран Заев ги договориле програмските политики важни за либералдемократите во делот на економијата, екологијата и изборните реформи.
„Усвоени се нашите барања кои ќе ги афирмираат нашите либерални политики, а тоа се: заокружување на процесот на децентрализација, отворање на Законот за локална самоуправа, воведување на моделот на една изборна единица, отворени листи за избор на советници, регулацијата на пазарот на криптовалути, измени во законите за градење и урбанистичко планирање со цел стопирање на урбаниот хаос во градските центри и ставање акцент на хуманото живеење и екологијата. Изградба на нова жичарница на Пелистер и развој на зимскиот туризам“,
се вели во соопштението од ЛДП.
Од ЛДП воедно укажале дека не отстапуваат од заложбите на политиката на рамен данок и укинување на парафискалните давачки кои се неданочни обврски за граѓаните.
Новоизбраниот претседател на СДСМ Димитар Ковачевски, заедно со неговиот претходник и актуелен премиер Зоран Заев денеска одржуваат средби со претставници на коалициските партнери кои се дел од парламентарното мнозинство.
Од СДСМ велат дека станува збор за консултативни средби за запознавање со начинот на досегашната соработка со коалициските партнери, како и идната соработка во коалицијата.