Се случи нешто незамисливо. На суверената држава ѝ е одземено правото да води надворешна политика. Меѓународните активности на Србија во насока на Русија се блокирани, рече рускиот министер за надворешни работи на денешната прес-конференција
Рускиот министер за надворешни работи Сергеј Лавров изјави дека ситуацијата со посетата на Србија е незамислива. Тој на денешната прес-конференција потенцира дека и покрај тоа главната работа е што никој нема да може да ги уништи односите со Србија, како и дека НАТО и ЕУ сакаат да го претворат Балканот во свој проект наречен „затворен Балкан“.
„Се случи нешто незамисливо. На суверената држава ѝ е одземено правото да води надворешна политика. Меѓународните активности на Србија во насока на Русија се блокирани“,
рече Лавров.
Тој додаде дека ставот на Западот во однос на лишувањето на Србија од можноста да избира партнери е циничен.
Лавров, исто така, рече дека тоа е демонстрација до каде НАТО и ЕУ можат да одат со користење најстроги средства и влијание против оние што се водат од националните интереси.
„Ако посетата на рускиот министер за надворешни работи на Запад се доживува речиси како закана на глобално ниво, тогаш, според сите сметки, работите на Запад се прилично лоши“,
рече Лавров, пренесоа српските медиуми повикувајќи се на РИА Новости.
Зборувајќи за можниот одговор на земјите кои му забранија на неговиот авион да лета за Србија, рускиот министер за надворешни работи рече дека Русија нема да направи ништо што може да ги наруши односите меѓу луѓето.
„Треба да има слобода на избор на партнери, за што се залагаше и самиот Запад, а тој самиот го уништи тој избор“,
рече Лавров.
Според него, Западот многупати покажал дека „ќе изврши притисок, не бегајќи од ниските средства и мерки, дури и за време на трагичното бомбардирање на СР Југославија во 1999 година“.
Во врска со одлуката на три држави – С Македонија, Црна Гора и Бугарија не дадоа дозвола за летање на неговиот авион преку нивниот простор, тој рече дека би се рекло дека тие самите ја донеле таа одлука, но додаде „но знаеме како било“.
Нагласувајќи дека ништо нема да ги уништи односите меѓу Србија и Русија, тој најави дека Москва го поканила шефот на српската дипломатија Никола Селаковиќ што поскоро да дојде во Русија.
„Се надевам дека Брисел нема да се посрамоти со авионот со кој ќе лета“,
рече Лавров.
Тој рече дека Брисел не сака Лавров и српските официјални претставници да разговараат за брзо развиваното стратешко партнерство, како и за меѓународните прашања.
„Очигледно, лидерите на Брисел не сакаа да ја потврдат позицијата на Русија за Косово и БиХ, за да изразат поддршка за иницијативата на Белград за Отворен Балкан. Разговараме за интересите за заздравување на односите меѓу земјите од регионот. НАТО и ЕУ сакаат да го претворат Балканот во нивен проект наречен ‘затворен Балкан’“,
рече Лавров.
Посетата на рускиот министер за надворешни работи Сергеј Лавров во Белград беше откажано откако земјите околу Србија го затворија воздушниот простор за неговиот авион.
Денеска Министерството за надворешни работи во објаснувањето за потегот на нашата земја објави дека го одби барањето на руската амбасада за специјално одобрение за користење на воздушниот простор за лет до Белград поради тоа што Владата веќе има донесено општа одлука за затворање на воздушниот простор на Северна Македонија за авиопревозници во сопственост на Руската Федерација.
РИА Новости денеска објави дека Русија би можела да ги отповика амбасадорите на Црна Гора и Бугарија поради ситуацијата со рускиот министер за надворешни работи Сергеј Лавров, изјави рускиот дипломат Сергеј Орџоникиџе.
С Македонија нема испратено амбасадор во Русија. Министерот за надворешни работи Бујар Османи на брифинг на 1 март објави дека се одложува упатувањето на нашиот амбасадор Ненад Колев во Москва, а ден потоа и шефот на државата Стево Пендаровски ден потоа потврди дека на Колев му е одложено заминувањето на амбасадорското место во Москва поради руско-украинската криза.