„Северна Македонија нè покани да присуствуваме на состанокот на министрите за надворешни работи на ОБСЕ. Бугарија наводно ѝ ветила на Северна Македонија дека ќе го отвори својот воздушен простор. Ако го направи тоа, ние ќе бидеме таму. Да почекаме и да видиме“, изјави шефот на руската дипломатија
Руска делегација ќе учествува на Министерскиот совет на ОБСЕ во Скопје доколку Бугарија го отвори својот воздушен простор за руските авиони, изјави денеска шефот на руската дипломатија Сергеј Лавров, пренесе Тасс.
„Северна Македонија нè покани да присуствуваме на состанокот на министрите за надворешни работи на ОБСЕ. Бугарија наводно ѝ ветила на Северна Македонија дека ќе го отвори својот воздушен простор. Ако го направи тоа, ние ќе бидеме таму. Да почекаме и да видиме“,
изјави Лавров.
Лавров додаде дека веќе добиле и неколку барања за средби, вклучително и од западни претставници, не прецизирајќи кој побарал средби со руската делегација.
„Во случај да дојдеме таму, се разбира, ќе се сретнеме со сите“,
додаде шефот на руската дипломатија.
Владата на С Македонија минатата недела донесе одлука со која практично се изменуваат актуелните рестриктивни мерки кон Руската Федерација кои земјава ги воведе по руската инвазија врз Украина, а согласно кои беше воведена забрана за влез на руски воздухоплови во воздушниот простор на Северна Македонија.
Но, конечната одлука за издавање на одобрението за прелет и слетување на рускиот воздухоплов над и во земјава за време на состанокот на ОБСЕ им припадна на министерствата за надворешни работи и за одбрана.
На новинарско прашање дали МНР го договорило доаѓањето на Сергеј Лавров и дали за тоа има поддршка од министерката за одбрана Славјанка Петровска, имајќи предвид дека таа на владината седница по ова прашање гласала воздржано, министерот Бујар Османи на брифингот во саботата кажа дека со колешката се на иста линија по однос на националниот капацитет, но дека тука не станува збор за билатерална средба.