ЕУ јасно стави до знаење дека има подготвени санкции и за Србија, тие ќе се применат доколку се сфати дека Србија не постапува според барањата на ЕУ
Специјалниот пратеник на Европската унија за дијалог меѓу Косово и Србија, Мирослав Лајчак, по двочасовната средба со премиерот на Косово Албин Курти во Приштина изјави дека моменталната ситуација не е лесна.
„Тој ги презентираше своите ставови, јас ги презентирав моите идеи и предлози, средбата беше долга, но многу важна“,
одговори Лајчак на новинарско прашање дали успеал „малку да го омекне Курти“.
Според Лајчактоа не е лесна задача, ниту пак лесна ситуација.
„Имав важни средби со претседателот Османи и со премиерот Курти. Морам да ги изберам зборовите, има разбирање за потребата да се оди напред по трите точки што ги предложи ЕУ, а тоа се деескалација, брзи нови избори и враќање на дијалогот за нормализација. Останува да продолжиме со дискусиите за конкретните чекори што треба да се преземат“,
рече Лајчак, пренесува Косово онлајн.
Запрашан за санкциите кон Косово, Лајчак рече дека не е во негова надлежност да ги коментира тие мерки, додавајќи дека јасно е дека Европската унија не е среќна што е во ситуација да ги донесе.
Тој додаде дека санкциите се подготвени и против Србија, доколку се констатира дека Белград не постапува во согласност со барањата на ЕУ.
„ЕУ јасно стави до знаење дека има подготвени санкции и за Србија, тие ќе се применат доколку се сфати дека Србија не постапува според барањата на ЕУ. Тоа е одлука на земјите-членки. Јас утре ќе бидам во Белград. Моја желба е да нема санкции против Косово и Србија. Мојата желба е двете страни да дојдат во Брисел и да преговараат како да ги спроведат договорите постигнати во февруари и март“,
рече претставникот на ЕУ.
Косовскиот премиер Албин Курти на средбата со Лајчак, како што пренесува Косово онлајн, посочил дека казнените мерки на ЕУ против Косово се неправедни и го прават дијалогот асиметричен.
Курти, како што се наведува во соопштението на косовската влада, ја изразил својата посветеност на деескалација и нормализација и истакнал дека косовската влада не придонесува за ескалација и оти косовската полиција само го спроведува законот и се грижи за јавната безбедност.