Според новинската агенција Ројтерс, вчеравечер голем број жители од повеќе делови на Хавана излегле на мирни демонстрации, досега најголеми до почетокот на кризата, барајќи да добијат струја
Кубанскиот министер за енергетика и рудници претходно во текот на вчерашниот ден изјавил дека нацијата целосно останала без дизел и мазут и дека нејзината електрична мрежа е во критична состојба, упатувајќи дека земјата е отворена за секој што сака да ѝ продаде гориво
Протести избувнале вчеравечер во главниот гран на Куба, Хавана, кој се соочува најтешките прекини во снабдувањето со електрична енергија во последните децении, поради блокадата на Соединетите Американски Држави (САД) на испораките на нафта на островот, пишува Ројтерс.
Според новинската агенција, стотици гневни Кубанци синоќа излегле на улиците во повеќе населби во Хавана, блокирајќи патишта со запалени купишта смет. Тие извикувале „Вклучете ги светлата!“ и „Народот обединет, никогаш нема да биде поразен“, додека удирале во метални садови за храна.
Репортери на Ројтерс сведочат дека забележале повеќе групи мирни демонстранти на повеќе локации во градот, во, како што ја опишуваат, ноќта со најголеми демонстрации во Хавана од почетокот на енергетската криза.
Недостатокот и прекините во снабдувањето со електрична енергија на островот драматично се влошија во јануари годинава, кога американскиот претседател Доналд Трамп изјави дека сака да ја собори комунистичката влада на Куба, по што воведе ембарго и се закани со царини за секоја држава што ја снабдува земјата со гориво.
„Живеам во заедница каде што има многу постари луѓе, многу од нив врзани за кревет. Нашата храна се расипува“, Почнавме да удираме со тенџериња за да видиме дали ќе ни дадат само три часа струја. Тоа е сè што сакаме. Ова не е политички проблем“,
ја пренесува Ројтерс изјавата на Родолфо Алонсо, жител на Хавана кој решил да протестира откако неговата населба Плаја останала без електрична енергија повеќе од 40 часа.
Агенцијата јавува дека за време на протест во една од населбите била вклучена струја, што предизвикало радост кај жителите кои брзо заминале во своите домови.
На сите места каде што имало собрани демонстранти, забележливо било силно полициско присуство, но, како што се наведува, безбедносните сили во најголем дел останале настрана, само набљудувајќи без да интервенираат.
Кубанскиот министер за енергетика и рудници претходно во текот на вчерашниот ден изјавил дека нацијата целосно останала без дизел и мазут и дека нејзината електрична мрежа е во критична состојба.
„Апсолутно немаме гориво (нафта) и апсолутно немаме дизел. Немаме резерви“,
рекол министерот за енергетика на Куба, Висенте де ла О Леви за државните медиуми.
Прекините на електричната енергија, навел министерот, драматично се зголемиле оваа недела, при што многу области во Хавана се без струја од 20 до 22 часа на ден, што ги зголемува тензиите во градот, кој е веќе исцрпен од недостиг на храна, гориво и лекови.
Функционерот навел дека Куба ги продолжила преговорите за увоз на гориво и покрај блокадата, но посочил дека зголемувањето на глобалните цени на нафтата и транспортот како резултат на војната меѓу САД и Израел со Иран дополнително го комплицира тој напор.
„Куба е отворена за секој што сака да ни продаде гориво“,
рекол министерот.
Ниту Мексико ниту Венецуела, некогаш главни добавувачи на нафта за Куба, не испратија гориво на островот откако Трамп се закани со царини.
Само еден голем танкер за нафта, „Анатолиј Колодкин“ под руско знаме, испорача сурова нафта на Куба од декември, обезбедувајќи привремена помош на островот во април.
Обновените прекини на електричната енергија во Хавана и пошироко доаѓаат во време кога американската блокада за увоз на гориво во Куба влегува во својот четврти месец, осакатувајќи ги јавните услуги низ карипскиот остров со речиси 10 милиони луѓе.
Обединетите нации (ОН) минатата недела ја оценија блокадата на горивото на Трамп како незаконска, наведувајќи дека со неа се нарушува правото на кубанскиот народ на развој, а воедно ги поткопува и нивните права на храна, образование, здравство, вода и санитација.