Според Конфедерацијата на слободни синдикати, 50 до 60 илјади ја имаат изгубено работата, а нови отпуштања се очекуваат во угостителскиот сектор
Конфедерацијата на слободни синдикати (КСС) најавува предупредувачки протест на 15 април незадоволна од актуелната ситуација во државата во однос на работничките права.
Одлуката за протестот е донесена на највисокиот орган на синдикатот на 7 април. Протестот ќе почне од булеварот „Гоце Делчев“ спроти Македонска телевизија, преку Собранието, a ќе заврши пред Владата.
Претседателот на КСС, Благоја Ралповски, на денешната прес-конференција рече дека македонскиот работник е осиромашен и не може да ја преживее кризата. Како што вели, се отпуштаат работници и се принудуваат да потпишуваат спогодбени договори за отказ.
Според Ралповски, апсурдно е да се зборува за зголемување на минималната плата од 1,7 проценти кога инфлацијата во март е 2 проценти. Од КСС посочуваат дека се вршат притисоци врз синдикалните лидери и се одолговлекуваат претставките во судовите поднесени од страна на синдикатите.
„Со овој предупредувачки протест ги повикуваме надлежните да седнат и сериозно да ги разгледаат нашите барања кои не се илузија, туку барања за имплементирање на постоечките закони“,
рече Рапловски додавајќи дека 50 до 60 илјади ја имаат изгубено работата, а нови отпуштања се очекуваат во угостителскиот сектор кој е затворен со новите рестриктивни мерки.