Од Конфедерацијата на слободни синдикати бараат да се покачи бодот за да може да се задржи разликата меѓу платите на вработените. Доколку Владата не ги исполни нивните барања, најавуваат генерален штрајк
Конфедерацијата на слободни синдикати (КСС) на 30 март ќе излезе на протест пред Собранието, во знак на незадоволство што досега не е направено усогласување на другите плати со минималната плата во јавниот сектор.
„Дел од гранските синдикати и КСС донесоа одлука да излеземе првично на улица на 30 март во 15:30 часот пред Собранието и да го искажеме нашето незадоволство затоа што уште во ноември минатата година испративме допис до сите пратеници барајќи усогласување на платите согласно минималната плата која во тој момент беше 15 200 денари“,
изјави денеска претседателот на КСС, Благоја Ралповски.
Од КСС бараат да се покачи бодот за да може да се задржи разликата меѓу платите на вработените. Доколку Владата не ги исполни нивните барања, најавуваат генерален штрајк.
„Ова е предупредувачки протест, што одлучивме да го направиме како една поблага мерка. Се разгледуваат најразлични чекори за понатамошна радикализација за стапување во генерален штрајк, има најразлични предлози од нашето членство. Пуштени се анкети во кој облик сакаат да го изразат своето незадоволство. Како ќе одлучи членството, така ќе биде“,
рече Ралповски.
Соопшти дека барале состанок со владини претставници, пред сè со премиерот Димитар Ковачевски, но оти досега не се сретнале со никого. Денеска, како што посочи, се поканети да присуствуваат на Економско-социјалниот совет.