Министерот за внатрешни работи Жералд Дарманин и министерот за дигитализација Жан-Ноел Баро вечерва во Париз ќе се сретнат со претставници на дигиталните платформи со цел да се побара „поддршка“ од за да се идентификуваат корисниците на социјалните мрежи кои се вклучени во криминал
Француската премиерка Елизабет Борн денеска најави дека на улиците во Франција ќе бидат распоредени оклопни возила на жандармеријата поради насилството во многу градови веќе три ноќи откако полицаец уби 17-годишно момче при сообраќајна контрола.
Ќе бидат распоредени и дополнителни мобилни сили. Големите настани што можат да претставуваат ризик за јавниот ред ќе бидат откажани во зависност од локалните ситуации, соопшти владата.
Тие одлуки се дел од мерките усвоени денеска на кризниот министерски состанок на кој присуствуваше и претседателот Емануел Макрон. Тоа беше втор кризен состанок за два дена.
Министерот за внатрешни работи Жералд Дарманин и министерот за дигитализација Жан-Ноел Баро вечерва во Париз ќе се сретнат со претставници на дигиталните платформи.
Состанокот ќе биде и можност да се побара „поддршка“ од платформи како Твитер, Снепчет и Тик-Ток за да се идентификуваат корисниците на социјалните мрежи кои се вклучени во криминал, се вели во соопштението од кабинетот на премиерката.
Вкупно 667 лица се уапсени во Франција, соопштија официјалните власти откако трета ноќ по ред беснеат насилства и немири во земјата по убиството на 17-годишното момче од страна на полицаец во Нантер, во близина на Париз.
Француските власти распоредија 40 000 полицајци низ целата земја за да се справат со ситуацијата, но и покрај тоа, немирите синоќа продолжија со несмален интензитет.