УНИЦЕФ, во соработка со Министерството за здравство и Клиниката за психијатрија, отвори уште две линии – за тинејџери и за родители на деца со попреченост
Две нови телефонски линии за поддршка на менталното здравје и психо-социјална поддршка на тинејџерите и на нивните родители, како и на родители на деца со попреченост, погодени од кризата со коронавирусот, отвори денеска УНИЦЕФ, во соработка со Министерството за здравство и со Универзитетската клиника за психијатрија.
„Телефонската линија 078 378 728 за помош на тинејџерите и на нивните родители и телефонската линија 070 291 574 за помош на родители на деца со попреченост ќе работат од 9:00 до 16:00 часот секој работен ден. Телефонската линија 072 912 676 за помош на деца на училишна возраст и на родители на деца на предучилишна и училишна возраст ќе работи од 9:00 до 19:00 часот секој работен ден“,
информираат од Канцеларијата на УНИЦЕФ во Скопје.
Ова е дополнителна поддршка на веќе воспоставената телефонска линија на Универзитетската клиника за психијатрија за родителите на децата од предучилишна и училишна возраст која сега е отворена и за самите деца.
„Сакаме да ги охрабриме родителите и децата да разговараат за сите прашања и проблеми. Нормално е тие да имаат различни реакции на ковид-19, како што е нормално да се борат да го задржат чувството на нормалност дома“,
вели Патриција ди Џовани, претставничка на УНИЦЕФ.
Во оваа ситуација, додава таа, децата и тинејџерите може да се чувствуваат тажно, изолирано, па дури и луто.
„Освен одговорното постапување за заштита од вирусот, треба да се погрижиме да бидеме безбедни и од второстепените негативни ефекти што пандемијата може да ги има врз нашето ментално здравје. Континуираниот стрес и анксиозност може значително да се одразат врз нашиот ум и способност да се одбраниме. Од огромно значење е сериозно да ги сфатиме нашата и благосостојбата и менталното здравје на нашите деца и да побараме поддршка“,
вели министерот за здравство Венко Филипче.
Директорот на Универзитетската клиника за психијатрија Стојан Бајрактаров вели дека, актуелната пандемија ја зголемува свесноста за грижата за нашето и за здравјето на нашите деца.
„Но, покрај физичкото здравје, во вакви услови е од особена важност да обрнеме внимание на менталното здравје, да ја развиваме отпорноста и поврзаноста во рамките на семејството, да ја искористиме оваа несакана состојба како можност за подобрување на ментална благосостојба пред сѐ на младите“,
вели професорот Бајрактаров.