Истрагата покажала дека организираната мрежа во повеќе наврати го повторувала делото – штеки цигари се купувани од грчки фришоп и без да се пријават и за нив да се платат давачки нелегално се внесувале во државата
Царинската Управа поднела кривични пријави против пет лица откако разоткрила мрежа за шверц на цигари. Еден од пријавените е сопственик на транспортна компанија.
„Во моментот кога првоосомничениот, возач на транспортна компанија, се обидел да направи примопредавање на цигарите во количина од 171 штека за што требало да му бидат исплатени кеш средства од 3 735 евра од нарачател на делото, истите се приведени од мобилен царински тим, а цигарите и девизите се запленети. По преземени предистражни дејствија од Одделението за истраги, при што извршени се и претреси на домовите како и форензичка анализа на мобилните уреди на сторителите, поднесена е кривична пријава до ОЈО“,
се вели во соопштението на Царина.
Оттаму додаваат дека истрагата покажа оти организираната мрежа на повеќе наврати го повторува делото, односно дека штеки цигари се купувани од грчки фришоп и без да се пријават и за нив да се платат давачки, нелегално се внесувале во државата.
„Делото го вршат преку користење товарно моторно возило – цистерна натоварена со нафта. Укажуваме дека секој обид за криумчарење е казнив по закон и истиот ќе биде најстрого санкциониран“,
велат од Управата.
