„Жално е што бев осуден во медиумите пред воопшто да ми се даде можност да се бранам. Сите знаат дека не сум криминалец. Општина Росоман ја раководам одговорно и чесно изминатите четири години, а така и ќе продолжам“, рече Николов на денешната прес-конференција
Градоначалникот на општина Росоман, Стојан Николов, денеска на прес-конференција ги демантираше наводите од кривичната пријава поднесена од Управата за финансиска полиција, оценувајќи дека постапката е политички мотивирана и оти е процесуирана наменски во период токму пред претстојните локални избори.
„Она што буди сомнеж за целата оваа постапка е тоа што Финансиска полиција првпат доаѓа во општината на 30 септември 2024 година, по што во најбрзо време им беше доставена целата документација што беше побарана од нивна страна. Зарем им беа потребни девет месеци за да поднесат кривична пријава, и тоа само неколку месеци пред локалните избори. Дали ова има некаква друга позадина, со оглед на тоа што во политички кулоари веќе се зборуваше дека ќе биде поднесена пријава токму против мене“,
рече тој.
Во однос на наводите наведени во кривичната пријава за злоупотреба на 35 милиони денари, Николов истакна дека станува збор за целосно реализирани проекти што граѓаните веќе ги користат.
„Тоа се реконструкции на улица во Росоман и паркови во три населени места. Општината немаше никаков допир со јавните набавки, ниту со плаќањето, ниту со надзорот – сè беше спроведено од централната власт“,
вели градоначалникот.
За обвинувањата за фалсификување на градежни дозволи и докумнети, тој вели дека ниту досега тоа го правел, ниту пак, отсега тоа ќе бидее случај.
„Општина Росоман ја раководам одговорно и чесно изминатите четири години, а така и ќе продолжам“,
кажа Николов.
Ги отфрли и наводите за злоупотреба на средства за репрезентации, прехрамбени производи и гориво, објаснувајќи дека сите трошоци се предвидени со буџетот, ребалансите и завршните сметки и се наменети исклучиво за активности на општината.
„Сите овие ставки се искористени за настани како ‘Духовден фест’, славата за ‘17 Декември’ во црквата ‘Света Троица’, и акцијата за Клепа“,
вели тој.
Посочи дека сето ова ќе го докаже со соодветни документи и докази пред надлежните органи.
„Жално е што бев осуден во медиумите пред воопшто да ми се даде можност да се бранам. Сите знаат дека не сум криминалец“,
рече градоначалникот.
Ја повика Финансиската полиција да влезе и во други општини.
Управата за финансиска полиција вчера соопшти дека е поднесена кривична пријава до Основното јавно обвинителство (ОЈО) Кавадарци против градоначалникот на Општина Росоман, Стојан Николов, поради сомнение дека сторил две кривични дела – фалсификување исправа и злоупотреба на службената положба и овластување.
Според соопштението од Финансиска полиција, градоначалникот на Општина Росоман, во текот на 2022 и 2023 година постапил спротивно на Закон за градење, на начин што изготвил шест лажни јавни исправи, од кои четири одобренија за градење и две одобренија за реконструкција на улици.
Покрај тоа, пријавениот свесно и со намера да се стекне со противправна имотна корист во својство на градоначалник на Општина Росоман ги надминал предвидените износи во буџетот на општината за трошоци за репрезентација.
Ги надминал и ненаменски искористил дел од предвидените износи во буџетот за трошоци за горива и масла (моторни возила), потпишувајќи и овозможувајќи од сметката на општина Росоман да се исплатат парични средства за нафтени деривати за возила кои не се во сопственост на општината.
Исто така, ги надминал и ненаменски искористил дел од предвидените износи во буџетот на општина за трошоци за прехранбени производи и пијалаци, набавувајќи производи кои не се за потребите на општината. Купени биле повеќе видови на млечни и сувомесни производи, поголеми количини алкохолни пијалаци, како и други видови производи кои по својата природа се наменети за домашна потрошувачка кошничка.
Воедно, неосновано склучил договори за управување со градежно земјиште во сопственост на РСМ со лица вработени во Општина Кавадарци за 2023 година.