Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава против лицето М.А. вработено како полицаец во полициската станица за гранична контрола – Табановце, осомничен дека сторил кривично дело злоупотреба на службената положба и овластувања.
Пријавениот на 10 јуни во својство на полициски службеник за пасошка контрола на влез во државава, соопштија денеска од МВР, овозможил влез на малолетно лице А.С. од Кавадарци без да го заведе во електронскиот систем за контрола на патници и возила, а воедно не побарал приложување на негативен ПЦР-тест за ковид-19 од малолетното лице односно не го упатил во државен карантин со што постапил спротивно на мерките согласно Одлуката на Владата на РСМ.
„Случајот е откриен истиот ден околу 19 часот кога полициски службеници од Одделението за безбедност на патниот сообраќај при вршење редовна контрола го запреле возилото во кое се превезувало малолетното лице утврдувајќи дека тоа нема регулиран влез во државата ниту негативен ПЦР-тест и не е упатено во државен карантин“,
се наведува во соопштението.
Од страна на Одделот за внатрешна контрола против полицискиот службеник М.А. поднесена е и иницијатива за поведување на постапка за утврдување на дисциплинска одговорност пред надлежната комисија при МВР.