Политичката партија Левица денеска поднесе кривична пријава до Основното јавно обвинителство-Скопје против претседателот на Собранието на Република Северна Македонија, Талат Џафери, поради тоа што, како што соопшти партијата, незаконски, со ‘европско знаменце’, го пуштил во собраниска процедура предлог-законот за изменување и дополнување на Законот за државјанството.
„Пријавениот се товари дека, во својство на овластено службено лице, како претседател на Собранието на РМ – на 22 јули 2021 година, без да го врати на доработка и неопходно доуредување, а по претходен договор и координација со Владата на РМ, илегално го пуштил во собраниска процедура со ‘европско знаменце’, односно во брза и полна легислативна постапка, контроверзниот предлог на закон за изменување и дополнување на Законот за државјанството на Република Македонија – по скратена постапка, со што на пратениците им нанел директна и индиректна штета, преку узурпација на неприкосновеното субјективно пратеничко право на говор и фактичко оневозможување на правото на предлагање амандмани од страна на народните избраници во македонскиот парламент“,
стои во соопштението.
Од партијата велат дека Џафери свесно и злонамерно не ја извршил својата службена должност и не се грижел соодветно за примената на Деловникот на Собранието, иако, како што се наведува, знаел и бил должен да знае дека предлог-законот во никој случај не ги исполнува деловничките услови.
„На овој начин, со своето свесно и злонамерно омисивно деликтно дејствие на пропуштање, т.е. неизвршување на својата службена должност (изречно стипулирана во членовите 136 и чл. 60 од Деловникот на Собранието на РМ + чл. 18 од Законот за Собранието на РМ + чл. 67 од Уставот на РМ) – спикерот Џафери, намерно и со предумисла, не се грижел соодветно и должно за примената на Деловникот на Собранието, иако знаел и бил должен да знае дека предлог-законот во никој случај не ги исполнува деловничките услови, бидејќи тој не врши никакво усогласување со која било регулатива или директива на ЕУ, туку лажно се наведени конвенции на Обединетите нации и на Советот на Европа“,
наведуваат од партијата.
Од Левица наведуваат дека очекуваат надлежното ОЈО-Скопје сериозно да ја земе во работа оваа, според нив, издржана кривична пријава и по неопходниот распит на пријавениот, како и по комплетирање на целокупната релевантна документација за овој настан, да покрене обвинение против актуелниот претседател на Собранието, со што, како што велат, еднаш-засекогаш би се ставил крај на сè позачестената злоупотреба на „европското знаменце“ за носење штетни закони во парламентот.