Од Судот не откриваат кој е судијата што ќе го суди овој предмет, што предизвикува голем интерес кај јавноста. Ова како што велат од Кривичен е од причина што судијата кај кој е распределен предметот можно е да побара изземање, бидејќи вакви моменти имало повеќе во текот на постапката за оценување на обвинителниот акт
Имено, дел од судиите кои требало да постапуваат во предметот побарале изземање бидејќи членови на нивните потесни семејства и други роднини се јавуваат како адвокати, бранители на дел од обвинетите во предметот или пак се во роднинска врска со жртви во трагедијата
Во целост е одобрен обвинителниот акт за пожарот во т.н. кабаре „Пулс“ во Кочани, во кој на 16 март загинаа 62 лица, а повеќе од 200 беа повредени, соопшти денеска Основниот кривичен суд Скопје.
На оценка на обвинителниот акт се чекаше речиси четири месеци, ако се земе предвид дека обвинението во кое се опфатени 34 физички и три правни лица беше поднесено на 13 јуни, односно безмалку три месеци по трагедијата.
Инаку, денеска (3 октомври), како што соопшти Кривичeн во понеделникот, истекуваат роковите за оценка на обвинението.
Во меѓувреме имаше притисок и од родителите и од блиските на загинaтите во трагедијата, кои се заканија дека мирните маршеви ќе ги заменат со протести и блокади, доколку судот до 3 октомври не се произнесе со информација до каде е постапката за предметот.
Во денешното соопштение од Кривичен хронолошки ги наведуваат фазите низ кои поминал предметот од поднесувањето на обвинителниот акт и предизвиците пред кои се нашол судот во изминатите речиси четири месеци, а поради кои дојде до одолговлекување на постапката за оценка на обвинението.
Крајниот исход е дека обвинението е одобрено во целост и преку автоматизираниот систем за управување со судски предмети – АКМИС е распределено кај судија кој ќе го води судскиот процес. Сепак, од Судот не откриваат кој е судијата што ќе го суди овој предмет, што предизвикува голем интерес кај јавноста. Ова, како што велат од Кривичен, е од причина што судијата кај кого е распределен предметот е можно да побара изземање, бидејќи имало повеќе вакви моменти во текот на постапката за оценување на обвинителниот акт.
„Советот за оценка донесе Решение К-ООА бр. 155/25 на 03.10.2025 година со кое го одобри обвинителниот акт во целост, по што се оформи кривичен предмет К. бр. 1872/25. Предметот согласно АКМИС е распределен кај надлежен судија за понатамошно постапување, а за сите понатамошни процесни дејствија поврзани со конкретниот предмет, странките и јавноста ќе бидат известени“,
се вели во соопштението од Основниот кривичен суд Скопје.
Инаку, откако ќе се знае кој ќе биде судија во предметот, треба да биде одреден датум за почеток на судскиот процес.
Имено, како што информираат од Судот, обвинителниот акт преку АКМИС бил распределен кај судијата Моника Бахчовановска, која согласно годишниот распоред на Судот постапува како претседател на Советот за оценка на обвинител. Покрај неа во Совет биле судијките Билјана Коцевска и нејзината колешка Бранка Наумовска.
Сепак, двете судијки побарале изземање од советот за оценка. Коцевска тоа го побарала затоа што нејзината ќерка Ивана Коцевска како адвокат е бранител на дел од осомничените, додека судијката Бранка Наумовска е во роднинска врска со една од жртвите во пожарот во „Пулс“.
Ова, како што наведуваа од судот, се причини кои во законот се предвидени како основ за изземање.
Исто така, според законот, оние што го оценувале не може да бидат и во советот што ќе ја води постапката и ќе донесе пресуда.
„По изземањето на овие две судии, како судии кои што ќе постапуваат во фазата на оценка поставени се двајца судии од Специјализираното одделение за судење на кривични дела од областа на организираниот криминал и корупција и тоа судијата Софче Гаврилова Ефремов и судијата Илија Трпков. Нивното определување е на начин што актите од одделението за организиран криминал и корупција ги оценуваат судии од одделот за кривично полнолетни (а ова е од причина што судиите кои што го оценувале актот не можат да учествуваат во постапка на главна расправа, а се со цел да не се доведе Основниот кривичен суд Скопје како најголем суд во државата да нема судии кои што ќе постапуваат по овој предмет). Двата члена на советот за оценка се поставени по редослед според годишниот распоред, како што и е предвидено во Судскиот деловник“,
се наведува во соопштението од Кривичен.
Дополнително, од Судот информираат дека од постапување во кривичниот совет иземен е и судијата Ивица Стефановски, бидејќи како бранител во овој предмет се јавуваат неговата сестра и адвокат со кој е во кумовска врска. Изземена е и судијката Елизабета Постоловска, која го нема законски предвиденото искуство и заради тоа не може да постапува по овој предмет.
„Заради сето тоа при распределбата на предметот овие судии се исклучени од автоматската распределба во АКМИС“,
велат од Судот.
Оттаму потсетуваат дека Врховниот суд 25 јуни донесе решение со кое за стварно и месно надлежен за постапување по обвинителниот акт го определи Основниот кривичен суд Скопје. Ова беше од причина што во кочанскиот суд немаше просторни и кадровски услови и било проценето дека по предметот треба да постапуваат „судии со стекнато искуство и познавање на кривичната материја кои ќе овозможат ефикасно, стручно и законито постапување, а воедно ќе придонесат за сензибилизирање на јавноста“.
Во меѓувреме додека советот за оценка постапувал по предметот на 15 јули републичкиот јавен обвинител до Основниот кривичен суд Скопје доставил решение со кое за стварно и месно надлежно обвинителство за постапување по обвинението поврзано со пожарот се определува Основното јавно обвинителство Скопје.
Според Кривичниот суд, проблем поради кои дошло до одолговлекување на постапката за оценување на обвинението, била и доставата и приемот на обвинителниот акт од страна на обвинетите и нивните бранители.
„Со оглед дека станува збор за обвинителен акт во кој што има 37 обвинети лица кои што имаат 33 бранители, беше исклучително тешко да се достави обвинителниот акт до сите нив, особено од причина што на голем дел од нив мерките притвор беа заменети, па во моментот на достава претседателот на советот за оцена имаше потешкотии да може да утврди кој обвинет каква мерка има и каде се наоѓа за да може да се изврши доставата. Особено потешкотии имаше и доставата на делот од бранителите на кои и покрај тоа што им се најавуваше терминот на достава, сепак истите не беа пронајдени во нивните канцеларии. Доставата ја вршевме преку судските служби на Основен кривичен суд Скопје, сѐ со цел да не се одолговлечи истото доколку оди по редовна пошта“,
велат од Кривичен.
Дополнителен проблем при доставата се јавил и поради тоа што во првично поднесениот обвинителен акт, пред тој да биде доуреден, во диспозитивот не биле целосно наведени личните податоци на обвинетите од страна на Основниот суд Кочани, како и решенијата за адресите каде се издржува мерката куќен притвор, што Кривичниот суд морал дополнително да го проверува.
„Но, и покрај сето тоа, судот во целост ја имаше предвид сензибилноста на постапката, јавниот интерес и пред сè чувствителноста на над 250 оштетени лица и семејства на починатите во пожарот. Токму поради тоа, се обиде на најефикасен начин да ги исполни сите законски обврски и да го оцени актот во предвидениот законски рок“,
велат од Основниот кривичен суд Скопје.
За потсетување, неполни три месеци од пожарот во т.н. кабаре „Пулс“ во Кочани, Јавното обвинителство на 13 јуни соопшти дека е поднесено обвинение против 34 физички и три правни лица за трагедијата.
Сите обвинети се товарат за кривичното дело тешки дела против општата сигурност, со исклучок на еден, кој е обвинет за примање мито за изготвување на лажните лиценци за да може објектот да функционира како кабаре-клуб.
Иако првично бројот на осомничени во истрагата беше поголем и изнесуваше околу 50 лица, за дел од нив постапките се прекинати бидејќи во текот на истрагата не се обезбедени докази за нив.
Меѓу лицата за кои се прекинува постапката се и двајца поранешни министри за економија.
Првообвинети се тројцата одговорни лица и сопственици на фирмата „Класик ДМ“ ДОО Кочани, чија подружница бил т.н. кабаре „Пулс“, односно фирмата „МММ Кафе“ ДООЕЛ Кочани. Обвинети за трагедијата се и тројцата ексградоначалници на Кочани, четворица директори на Дирекцијата за заштита и спасување, пет државни службеници, еден генерален секретар и двајца министри за економија, службеници на Државниот пазарен инспекторат, како и членови на обезбедувањето на клубот, од кои еден, како што беше кажано, немал ниту лиценца за вршење на дејноста.
За случајот со „Пулс“ пред неполн месец, 5 септември, Обвинителството поднесе уште еден обвинителен акт против сопственикот на фирмата за обезбедување „Рубикон“, Александар Нацев.
Нацев, исто така, се гони за тешки дела против општата сигурност бидејќи, според обвинителството, тој има особен придонес во пропустите за „Пулс“ односно не постапил според прописите и техничките правила за мерките за заштита и со тоа предизвикал опасност за животот и телото на луѓето, како и имотот од големи размери.