Семејството на Кулакова, на рочиштето во петокот на кое Јованов призна вина, побара од судот да му изрече максимална казна. Од друга страна, бранителот на обвинетиот, адвокатот Сашко Дуковски, рече дека судот мора да го земе предвид фактот на признавање вина од страна на неговиот клиент
Во Основниот кривичен суд Скопје денеска треба да биде изречена пресудата за Васил Јованов, обвинет за сообраќајката во која ја прегази младата Фросина Кулакова на пешачки премин во Скопје.
Според обвинението, на 29 јануари годинава, Јованов, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје. На пешачки премин, на црвено светло, удрил во Кулакова, која поминувала на зелено светло за пешаци. Од силата на ударот, Фросина се здобила со тешки телесни повреди и починала на лице место. За делото за кое се товари Јованов е предвидена затворска казна до 20 години.
Главната расправа по предметот почна и заврши за еден еден, односно во петокот, откако обвинетиот Јованов, одговарајќи на прашање на судијката Снежана Марковска, која го води судењето, дали го разбира кривичното дело за кое се товари и дали се чувствува виновен, рече: „Да, виновен сум!“
Со ова тој призна вина за кривичното дело тешки дела против безбедноста на луѓето и имотот во сообраќајот.
На рочиштето, потоа само се изведуваа докази кои се однесуваа на одмерувањето на висината на казната, а не и за настанот.
Обвинителот, Александар Марковски рече дека останува на наводите во обвинението. Како докази за одмерување на видот и висината на казната, тој пред судот наведе дека Јованов пред критичниот настан имал многубројни прекршоци со истото возило, а ја наведе и пресудата за кривичното дело за кое е осуден на Јованов, а кое, како што е познато во јавноста, се однесува за поседување и продавање дрога.
„Беа прибавени докази во поприличен број, беа изготвени четири вештачења од кои сообраќајното е особено податливо. Има осум сведоци, има многубројни материјални докази од кои дел останале во подоцнежното обвинение поднесено против таткото“,
рече обвинителот.
За бранителот на Јованов, адвокатот Сашко Дуковски, судот при одредувањето на висината на казната треба да го земе предвид фактот што неговиот клиент призна вина и изразил, како што рече, длабоко и искрено каење за стореното.
„Сакам да имате предвид еден многу битен факт. Се работи за човек којшто има 20 години, категорично ја призна својата вина и тоа покажува дека една така млада личност е личност со интегритет, дека неговото семејство е со интегритет и имаше доблест да признае и да се сноси со сите последици кои ќе дојдат после неговото признание“,
рече Дуковски.
Семејството на Фросина, нејзиниот татко, мајка, сестра и брат, на рочиштето минатата недела, исто така, побараа максимална казна за обвинетиот Јованов. Наведоа дека тоа што тој признал вина е ирелевантно, а нивниот правен застапник, адвокатот Дарко Ал Блана рече дека обвинетиот признал вина за да добие поблага казна.
Камелија Кулакова, мајката на Фросина, по излегувањето од зградата на Судот, во изјава за медиумите го повтори она што го кажа и внатре.
„Јас само се надевам дека после ова долго рочиште судот ќе покаже дека законите имаат душа и дека правдата има лице, дека животот на Фросинче нема да заврши во празнина и дека ќе се изрече највисока казна“,
рече таа.
Обвинетиот Васил Јованов, во завршен збор пред Судот, изрази каење за случајот, наведувајќи дека има голема грижа на совест и оти носи голем товар.
„Не можам да ви објаснам какво каење чувствувам. Не поминува ден, а да не се молам за душата на Фросина и за здравјето на нејзиното семејство. Ова е нешто што ќе ме прогонува до крајот на мојот живот. Сакам да изразам најдлабоко сочувство до фамилијата и најдлабоко извинување за оние што ја познаваат. Не знам како ќе продолжам со остатокот од мојот живот“,
рече Јованов.