Трамп во понеделникот рече дека од следниот месец е можна негова посета на Саудиска Арабија, што ќе биде негова прва странска посета по враќањето во Белата куќа во јануари. Тој во февруари навести дека во таа земја, веројатно, би можел да се сретне со Путин
Можната посета на американскиот претседател Доналд Трамп на Саудиска Арабија, која би можела да се случи во следните недели, нема никаква врска со Владимир Путин, соопшти денеска Кремљ, додавајќи дека во оваа фаза не е планирана средба меѓу двајцата лидери.
Трамп во понеделникот рече дека од следниот месец е можна негова посета на Саудиска Арабија, што ќе биде негова прва странска посета по враќањето во Белата куќа во јануари.
Тој во февруари навести дека во таа земја, веројатно, би можел да се сретне со Путин, без да наведе конкретен датум. Оттогаш, саудиското кралство е домаќин на разговори на повеќе делегации за конфликтот во Украина.
Дмитриј Песков, портпаролот на Кремљ, на прашањето за можната посета на Трамп на Саудиска Арабија, одлучно одговори дека тоа нема никаква врска со Путин.
„Рускиот претседател засега нема такви планови“,
рече Песков.
Според него, Русија продолжува да одржува контакти на различни нивоа, преку различни канали, но ништо конкретно не е договорено во врска со датумот и локацијата на евентуалната средба меѓу Путин и Трамп.
Трамп се зближи со Москва откако ја презеде функцијата, но е познат и по тоа што го критикува и му се заканува на својот руски колега.
Трамп и Путин последен пат се сретнаа во 2018 година во Финска за време на првиот мандат на републиканскиот претседател од 2017 до 2021 година.