Цената на нафтата вчера се искачи на повеќе од 100 американски долари за барел, првпат од почетокот на војната во Украина во 2022 година, бидејќи нападите врз Иран ги попречуваат производството и испораката на Блискиот Исток
Американскиот претседател Доналд Трамп на неговата социјална мрежа Трут сошал објави дека зголемувањето на цените на нафтата, предизвикано од конфликтот во Иран, е мала цена што треба да се плати за безбедноста и мирот во светот, пренесува Си-ен-ен.
„Краткорочниот скок на нафтата, што брзо ќе падне откако ќе се заврши уништувањето на иранската нуклеарна закана, е многу мала цена што треба да се плати за безбедноста на САД, светот, безбедноста и мирот. Само будалите би размислувале поинаку“,
напиша Трамп на Трут сошал.
Цената на нафтата вчера се искачи на повеќе од 100 американски долари за барел, првпат од почетокот на војната во Украина во 2022 година, бидејќи нападите врз Иран го попречуваат производството и испораката на Блискиот Исток.
Откако САД и Израел започнаа заеднички воени напади врз Иран минатиот викенд, цените на нафтата скокнаа, забележувајќи го својот најголем еднонеделен скок од март 1983 година.
Министерот за енергетика на САД, Крис Рајт, рече дека никогаш не може да се знае точно во која временска рамка ќе трае ваквата состојба, додавајќи дека во најлош случај тоа ќе биде со недели.
Иран се закани дека ќе го нападне секој танкер за нафта што ќе помине низ Ормутскиот Теснец, низ кој транзитираат 20 отсто од светската нафта.
Белата куќа соопшти дека ќе работи на обезбедување поморска придружба за бродовите. Сепак, превозните компании рекоа оти се двоумат да транзитираат низ регионот додека трае конфликтот.