Корекцијата на бројките на новозаразени е направена откако пристигнале резултатите од приватна лабораторија, кои доцнеле за денешната статистика
Министерството за здравство вечерва ги коригираше бројките на новодијагностицираните со ковид-19 во изминатото деноноќие, со што бројката е 76 заразени.
Во соопштението се наведува дека новите 9 случаи се потврдени во приватна лабораторија, од каде што доцнеле резултатите за да бидат вклучени во статистиката што денеска на прес-конференцијата во 15 часот ја соопшти министерот за здравство Венко Филипче.
Воедно коригирана е и бројката на направени тестови, која сега изнесува 885, во споредба со претходните 868 тестови.
Со тоа статистиката за ковид -19 во земјава во изминатите 24 часа е еден починат пациент и 76 нови случаи на ковид-19 од спроведени 885 тестирања. Најголем број од случаите се во Скопје-52, во Тетово-14, по два случаи во Куманово, Велес и Гостивар, и по еден во Штип, Кочани, Пробиштип и Кратово.
Денеска Институтот за јавно здравје регистрира 26 оздравени пациенти во Скопје-12, Куманово-2, Тетово-11 и Гостивар-1.
Во ГОБ „8 септември“ почина 56-годишна пациентка од Струга која била примена во болницата на 21 мај како сомнителна на ковид, по што нејзиниот тест бил потврден како позитивен по приемот во болницата.
Вкупната бројка на ковид дијагностицирани во нашата земја од почетокот на епидемијата изнесува 2 391, бројката на оздравени пациенти е 1 595, на починати е 141, а во моментов бројот на активни случаи во земјата изнесува 655. Последната дистрибуција по градови е следната:
• Скопје 928, активни 338
• Куманово 469, активни 55
• Дебар 51, активни 0
• Штип 104, активни 69
• Прилеп 212, активни 30
• Тетово 231, активни 86
• Струга 84, активни 12
• Велес 132, активни 29
• Битола 28, активни 3
• Охрид 23, активни 6
• Кавадарци 5, активни 0
• Гостивар 29, активни 8
• Гевгелија 4, активни 0
• Струмица 4, активни 2
• Крива Паланка 6, активни 0
• Радовиш 4, активни 0
• Крушево 3, активни 0
• Кочани 38, активни 7
• Пробиштип 3, активни 1
• Демир Хисар 1, активни 0
• Македонски Брод 2, активни 0
• Пехчево 3, активни 0
• Берово 1, активни 0
• Валандово 2, активни 1
• Виница 3, активни 1
• Делчево 1, активни 0
• Кратово 3, активни 1
• Свети Николе 2, активни 2
• Кичево 3, активни 1
• Неготино 12, активни 3 (*7 лица од ПЕ Неготино се жители на Демир Капија)
Од направените 885 теста, преку ИЈЗ се 249, ЦЈЗ Скопје-34, Авицена –35, Биотек -136, Жан Митрев (Филип Втори) – 175, Систина со PCR метода -128 и МАНУ -128.
Досега во земјата се направени вкупно 31 187 тестирања на ковид -19.
Од вкупниот број направени тестови во изминатото деноноќие 127 теста се во рамките на скринингот. Тестовите се направени во градинки во Скопје и геронтолошки установи и не се потврдени позитивни случаи на ковид-19.
Шест пациенти се на респиратор
До утрово на Клиниката за инфективни болести и фебрилни состојби во изминативе 24 часа примени се 6 пациенти, со што хоспитализирани се вкупно 40 пациенти. Потешко болни и на кислородна поддршка се 16 пациенти, нема пациенти на механичка вентилација.
До утрово, во ГОБ „8 Септември“ примени се 9 нови, а вкупно хоспитализирани 31 пациент. На респираторна машина се 6, a со потешка клиничка слика се 6 пациенти.
Во болницата во Битола се хоспитализирани 7 пациенти, а на домашно лекување се следи 1 пациент. Во болницата во Штип се хоспитализирани 14, а на домашно лекување се следат 16 пациенти. На инфективните одделенија во Охрид, Велес, Куманово и Прилеп се хоспитализирани 27 пациенти – позитивни и сомнителни на ковид-19.