Проценките се дека на овој континент може да заболат 231 милион луѓе, а 150 000 да починат како последица на ковид-19
Најновото истражување на Светската здравствена организација (СЗО) спроведено во Африка предупредува дека од коронавирусот можат да се заразат до 231 милиони лица, пренесе Дојче веле.
Новото истражување на СЗО, кое вклучува моделирање на ширењето на заразата во Африка, покажа дека доколку не се преземат „итни мерки“ на Црниот Континент може да се заразат околу 231 милион лица, а вирусот во следната година може да убие и до 150 000 лица.
Истражувањето го проектира потенцијалното ширење на коронавирусот во 47 африканските земји врз основа на факторите како густина на населението и воведените ограничувачки мерки.
И покрај тоа што истражувачите тврдат дека многу африкански држави брзо презеле мерки за ограничувања, слабите здравствени системи во нив можат брзо да попуштат.
СЗО ги повика африканските земји брзо да ги зголемат своите здравствени капацитети, особено во јавните болници.
Притисокот од ковид-19 врз системите за здравствена заштита во овие земји се засилува и од ширењето на другите болести што веќе се раширени на континентот, како СИДА, туберкулоза, маларија и неухранетост, се наведува во истражувањето на СЗО.
Според „Ворлдометерс“, во Африка досега има пријавено 77 030 заболени и 2 579 починати лица од ковид-19.