Во изминатите 24 часа во земјава починаа шест лица како последица на ковид-19 и дијагностицирани се 22 нови случаи на заболени, соопшти Министерството за здравство.
Според информациите од Институтот за јавно здравје, 36 лица со два негативни теста се потврдени дека се излекувани од ковид-19.
Двајца од починати се пациенти од Инфективната клиника во Скопје, обајцата од Прилеп – 58-годишен маж, кој на клиниката бил примен на 19 април и 63-годишен пациент кој бил на болничко лекување од 9 април, и биле приклучени на механичка вентилација.
Во ГОБ „8 Септември“ починаа три лица, од кои двајца се од Скопје на 75 и 58-годишна возраст и двајцата хоспитализирани на 26 април, и пациентка од Тетово на 51 година, хоспитализирана од 12 април. Пред два дена почина и пациентка од Скопје на Клиниката за онкологија на 71 година. Нејзиниот позитивен резултат на ковид-19 е стигнат во текот на вчерашниот ден.
Во изминатите 24 часа направени се 362 тестирања, а потврдени се 22 нови случаи на ковид-19, и тоа во седум града: во Скопје – 11, Куманово – 2, Велес – 3, Кавадарци и Гостивар по двајца и Неготино и Струга по еден.
Со ова, вкупната бројка на дијагностицирани со коронавирус во нашата земја изнесува 1 421, бројката на оздравени пациенти е 589, на починати е 71 , а во моментов бројот на активни случаи во земјата изнесува 761.
Институтот за јавно здравје регистрира 36 оздравени пациенти во 8 града: Скопје – 19, Штип – 5, Прилеп – 4, Велес – 3, Гостивар – 2 и Куманово, Тетово и Струга по еден.