Според порталот „Локал“, земјата во моментов не работи на утврдување кога се појавиле првите случаи во земјата
Шведската агенција за јавно здравје објави дека е можно да имало случаи на коронавирусот во оваа земја уште во ноември минатата година.
Соопштението на оваа агенција следува откако Франција објави дека маж бил заразен со вирусот во земјата на 27 декември, неколку дена пред да се пријават првите случаи во Кина.
Тогаш на пациентот му била дијагностицирана пневмонија, но примероците што тогаш биле земени сега повторно се тестирани и се позитивни на коронавирусот.
Мажот целосно закрепнал и наводно не знае како се заразил.
Главниот шведски епидемиолог, Андерс Тегнел, вели дека е можно во тоа време да имало заразени и во Шведска, но според порталот „Локал“ земјата во моментов не работи на утврдување кога се појавиле првите случаи во земјата.
„Немаше никакво ширење надвор од Вухан сè додека не се појави подоцна во Европа, но мислам дека би можеле да откриеме индивидуални случаи меѓу патниците од Вухан кои биле таму во ноември и декември минатата година. Тоа воопшто не звучи чудно, туку сосема е природно“,
рече Тегнел.
Првиот официјално потврден случај на коронавирусот во Шведска е жена кај која вирусот бил потврден на 31 јануари, по нејзиното враќање од Кина, и која во меѓувреме е излекувана.