Пратеникот од редовите на ВМРО-ДПМНЕ обвини дека новиот косопственик на зградата „Соравија“, Дрин Ахмети, кој воено е и внук на претседателот на ДУИ, Али Ахмети, не платил ниту денар за купување на бизнис-центарот ниту, пак, платил за данок на промет, па затоа побара од надлежните институции темелно да го испитаат случајот
Ковачки на прес-конференција побара од, како што кажа, владата на Ковачевски и институциите кои се под негова контрола, наместо да молчат, да се одважат и да кажат како е извршена трансакцијата за купувањето на „Соравија“ од страна на Дрин Ахмети и дали е платен данок на промет.
„Дали внукот на Ахмети покрај тоа што не платил ниту денар за ’Соравија’, не платил ниту денар на име данок на промет? Според тоа што го објавија медиумите во нивни истражувања не е евидентирана никаква трансакција во Македонија? Оттука Ахмети треба да каже како е направена купопродажбата и преку која даночна регулатива“,
вели Ковачки.
Истовремено, вели Ковачки, мора да се нотира дека тврдењата на одредени лица дека „Соравија“ е загубар, со големи кредити е ноторна лага бидејќи, според достапните информации, може да се заклучи дека за две години, деловниот центар остварил добивка од 2 милиони евра, иако не е целосно искористен.
„Деловниот центар ’Соравија’ е голем објект кој има голем неискористен простор. Оттука логички се поставува прашањето, дали во истиот ќе се најдат како закупци фирми блиски до власта или можеби и државни органи? Дали кланот Зајас преку ’Соравија’ ќе вади милионски профити“,
рече Ковачки.
ДУИ преку соопштение денеска го обвини ВМРО-ДПМНЕ дека е фабрика за лажни вести и дека партијата ги игнорира сите совети и напори на меѓународната заедница со што го блокира европскиот пат на С Македонија, со што се обидуваат да ја изолираат земјата и да ја вратат заробената држава од времето кога владееле.