Ако некој решил да се изолира и ако притоа решил да ја изолира и својата политичка партија, тој не може и нема право да ја изолира цела држава. Она што ние го имаме пред нас се одлуки за продолжување на патот кон полноправно членство во ЕУ, го повтори својот став за уставните измени премиерот Димитар Ковачевски
Уставните измени не се за Владата, тоа е одлука за граѓаните и за државата и секој треба да го има пред себе прво интересот на граѓаните, на идните генерации, а потоа личниот политички интерес, го повтори својот став за уставните измени премиерот Димитар Ковачевски.
„Ако некој решил да се изолира и ако притоа решил да ја изолира и својата политичка партија тој не може и нема право да ја изолира цела држава. Она што ние го имаме пред нас се одлуки за продолжување на патот кон полноправно членство во ЕУ. И после таа одлука ќе има уште тешки одлуки затоа што тие реформи не се едноставни. Тоа се реформи кои сите држави членки на ЕУ ги поминале. Но, низ тие реформи, низ такви одлуки изградиле подобро општество“,
рече Ковачевски.
Во однос на тоа дали се интензивира процесот на уставните измени и дали има некакви преговори, Ковачевски потсети на одржаната лидерска средба, каде што не присуствуваа две политички партии.
„Јас веќе одржав лидерска средба со сите лидери на политички партии. Таму не дојдоа две политички партии и ќе повторам уште еднаш – најголемата опасност за нашиот пат кон ЕУ лежи во една политичка партија која што има антиевропска, анти-НАТО и антиинтеграциска политика со Западна Европа. Тоа е Левица и нивниот претседател Димитар Апасиев. И тие веќе го имаат во заложништво претседателот на ВМРО-ДПМНЕ и ВМРО-ДПМНЕ затоа зашто тој е слаб, без став и без визија и ние како политичари кои ја гледаат државата во ЕУ, како граѓани коишто ја гледаат државата во ЕУ заради себе, заради нашите деца, заради идните генерации не смееме да дозволиме политиката да биде креирана од такви политички пиромани кои немаат никаква визија за државата“,
повтори Ковачевски на заедничката прес-конференција во Владата со европратеничката и лидерка на прогресивната алијанса на социјалдемократи во Европскиот парламент, Ираче Гарсија Перез.