Премиерот Димитар Ковачевски денеска оствари телефонски разговор со генералниот секретар на НАТО, Јенс Столтенберг, во кој ја изрази неговата поддршка и поддршката на Владата за покажаното лидерство и продолжувањето на мандатот на генералниот секретар во овие исклучително сложени околности предизвикани од воената агресија на Русија на Украина, се вели во соопштението на владината прес-служба.
Во текот на телефонскиот разговор Ковачевски и Столтенберг разговарале и за „единството и одлучниот одговор на Алијансата“, во врска со војната во Украина, како и дека Северна Македонија останува посветена и отворена да ја помага Украина.
„Република Северна Македонија, истакна Ковачевски во разговорот со генералниот секретар Столтенберг, го дава максимално својот придонес во одговорот и политиките на НАТО во однос на ова прашање и останува и понатаму посветена да ја помага Украина во делот на координираните активности со Алијансата, како и во прифаќање на бегалците од оваа земја“,
додаваат од Влада.
Ковачевски за време на разговорот изразил силна поддршка за иницијативата на Шведска и Финска да станат дел од НАТО, како и дека С Македонија ќе ја забрза постапката за одобрување на апликациите на овие земји за членство во Алијансата.
„Како израз на силна поддршка на политиката на отворени врати, премиерот Ковачевски во разговорот со Столтенберг ја поздрави иницијативата на Шведска и Финска да станат членки на НАТО и потенцираше дека Северна Македонија ќе ја забрза постапката за одобрување на приемот во членство во Алијансата на овие две земји. Генералниот секретар на НАТО Јенс Столтенберг во разговорот со Ковачевски ја поздрави поддршката на Северна Македонија за итен прием на Шведска и Финска во НАТО, и го потенцираше успехот на воената вежба „Брз одговор 22“ (Swift Response 22), што ја потврди нашата земја како вреден партнер на Алијансата“,
се додава во владиното соопштение.