Видете, кога ќе има доволен број на гласови, 120 кога ќе гласаат минус два од Левица коишто сигурно нема да гласаат. Тие се против членството на државата во Европската Унија и сѐ дотогаш оставам простор на договори и секој да ги модерира своите ставови, рече премиерот
Гласањето за уставните измени во македонското Собрание значи гласање за обезбедување европска иднина на државата и продолжување на процесот на евроинтеграција, којшто зависи од нас, порача денеска од Гевгелија премиерот Димитар Ковачевски. Тој посочи дека ќе следи усогласување на ставот на политичките партии бидејќи, како што нагласи, пред нас имаме исклучително значајна одлука, а тоа е продолжување на европската интеграција на државата.
„Порано ако сме имале вето од надвор, денес за првпат може ветото да дојде внатре од државата. Меѓутоа еве да дадеме простор на процесот, сите да можат да ги кажат своите ставови и да ги моделираат согласно своите и интересите на граѓаните коишто сакаат со огромно мнозинство над 80 проценти да живеат во земја членка на ЕУ“,
рече Ковачевски одговарајќи на новинарски прашања.
Во дополнителното прашање дали е направен договор со ВМРО-ДПМНЕ за гласање на уставните измени, Ковачевски кратко одговори дека остава простор за договор.
„Видете, кога ќе има доволен број на гласови, 120 кога ќе гласаат минус два од Левица коишто сигурно нема да гласаат. Тие се против членството на државата во Европската Унија и сѐ дотогаш оставам простор на договори и секој да ги модерира своите ставови“,
рече Ковачевски кој присуствуваше на доделување на социјални станови во Гевгелија.